坤哥搵了多位肌男伴舞演繹快版《原來她不夠愛我》：「邊個話我冇快歌㗎？」
現年26歲、僅出兩隻碟就踏上紅館的吳業坤，前晚舉行終極一場處男騷，坤哥唱盡了15首自己的歌，成名作《原來她不夠愛我》和《陽光點的歌》更各唱兩次，其餘時間不計與大堆頭嘉賓合唱，就靠演繹27首別人的歌撐場，坤哥感慨說：「下次我會儲夠30首歌先開騷！」
吳業坤2010年參加無綫節目《超級巨聲2》獲第五名入行，出道五年只在劇集扮路人甲及於台慶騷扮棋子，鍾意唱歌的他去年終等到機會，憑《原來她不夠愛我》和《陽光點的歌》一炮而紅，坤哥的發憤圖強精神感動人心，於叱咤樂壇頒獎禮連奪我最喜愛的男歌手及歌曲獎，因毒男形象被網友封為「偽毒坤」，更獲公司為他鋪路唱上紅館，於前晚僅開一場。
昨日是千嬅跟老公丁子高的結婚周年，但千嬅為撐坤哥前晚寧願取消食飯慶祝，認真錫後輩。
表演嘉賓之一的張智霖跟觀眾握手，大受歡迎。
台灣歌手盧廣仲（右）都來港為坤哥撐場，兩人更在台上玩自拍。
千嬅壓軸教訓
由於坤哥只出了兩張碟，網友好奇他是否夠歌撐足一個騷，結果坤哥唱了15首自己的歌，成名作《原》和《陽》兩曲更各唱了兩次，其餘就唱陳奕迅、古巨基、林憶蓮、謝安琪等歌曲撐場，甚至連捧場藝人許廷鏗、林奕匡的歌曲都被揀中演繹，圈中人緣甚好的坤哥更獲楊千嬅、張智霖、盧廣仲和王祖藍大堆頭嘉賓撐場，坤哥跟他們各合唱一首，每位嘉賓又獨唱一首，令處男騷順利撐足近三粒鐘完場。
千嬅是壓軸出場的嘉賓，她叮囑坤哥：「我替你媽媽好開心好感動，喺我咁多年失敗嘅過程中，我畀個錦囊你，一個人無論遇到任何挫折麻煩，只會令你更加成功。有啲人會批評你，講啲說話恐嚇你，但你要記住，一定要聽媽咪講，𠵱家你要信媽咪，第時就信老婆咁就啱㗎喇！」而張智霖（Chilam）就跟坤哥合唱《兵兵》，坤哥說：「我都好鍾意你㗎，不如拖一下啦！」嚇到Chilam說：「嘩！咁好攣喎！」坤哥懇求：「拖一秒啦！」最後兩手掂了一下，全場爆笑。
首次開紅館騷的坤哥有幾十位小朋友傍實，戴上自己的招牌眼鏡look陪住唱。
着白色透視雞翼袖長衫的坤哥，一洗偽毒男形象。
長衫清洗偽毒
坤哥全晚落力演出，還着白色半透視雞翼袖長衫洗偽毒look，尾聲時感觸自嘲：「吳業坤得兩首歌，應該九點幾就可以走，但係對唔住呀，搞到大家咁夜返屋企，下次我會儲夠30首歌先開騷，多謝大家！」
完騷後坤哥接受訪問，問到唱了幾多首自己的歌？坤哥坦言：「大約三分之一，約有20首係人哋嘅歌，我有自知之明，知道自己嘅歌唔夠，揀人哋嘅歌唱到聲嘶力竭，希望大家感受到。」問到緋聞女友盤菜瑩子沒捧場，他說：「我都冇女朋友。」兩人有否發展機會？他說：「都係做好自己嘢先，因為自己講嘢好容易連累人，破壞力好強，所以唔講咁多啦。」
採訪：馬建華
攝影：陳順禎
【翻唱歌單】坤歌走天涯
坤哥首個紅館個唱，唱了逾二十首別個歌手的歌，與他差不多時候出道的樂壇中人的歌，他都有唱（詳見附表）。
from:
http://hk.apple.nextmedia ... 160812/19732825
