何超蓮甩拖桃花旺到爆與霍啟山廣州撐枱腳

24歲的賭王三房索爆千金何超蓮回覆單身多戀事，重投愛情市場的她裙下之臣輪流轉，有傳內地百億家底富二代劉根森、霍震霆次子霍啟山都加入爭蓮戰團。繼聖誕日超蓮孖劉根森遊勻珠海和中環，原來兩天後已華麗轉身上廣州跟啟山撐枱腳，當場被本報讀者「爆相」捕獲，兩人著黑色情侶裝叫了一枱食物，超蓮還拿手機跟啟山分享內容，似乎情非泛泛。

賭王何鴻燊三房千金何超蓮才貌雙全，不但被封為何家最索千金，三年前更以一級榮譽成績畢業於倫敦大學皇家賀洛唯學院，獲頒經濟學學士，有樣有身材有腦的超蓮，本月初在社交網Instagram字字似淚狠撇疑劈腿的舊愛吳克羣，回覆單身貴族的超蓮即成為搶手貨，裙下之臣都是家族來頭甚猛的有錢仔，早前傳出霍英東孫兒霍啟山向超蓮發動猛烈追求攻勢，但一直只聞樓梯響，反而超蓮於上週五聖誕節孖內地富二代劉根森同遊珠海玩過山車，卻被本報讀者現場直擊。

霍啟山為霍震霆的次子，又是廣州政協委員，幫屋企打理內地生意。資料圖片

【不離手機】
超蓮和啟山據說是洽談合作計劃，其間超蓮手機不離手。讀者提供圖片

【望街對吃】
兩人坐在菜館近窗位置，超蓮更背向食客十分低調。讀者提供圖片

上週五聖誕節，超蓮和劉根森同遊珠海被讀者「爆相」捕獲。

食唔曬打包

正當以為劉根森在爭蓮戰先勝一仗，昨日讀者鄭先生透過本報「爆相爆片」報料，大前日在廣州野生捕獲超蓮和一男子撐枱腳。鄭先生在電話說：「27號下晝大約兩點半，喺廣州天河區嘅炳勝中菜館，見到佢哋兩個入嚟食飯，有架掛廣州牌新款七人車喺外面等。佢兩個坐到好埋，超蓮喺度玩手機，兩個人叫咗成枱餸食唔曬，埋單時侍應攞咗啲外賣盒嚟，超蓮就自己起身打包，嗰個男人負責畀錢。」

記者根據鄭先生提供的「爆相」，發現跟超蓮同著黑色情侶衫的男人，雖然只看到側面，卻不難認出就是霍家公子啟山。其實早於本月初，已傳啟山落力出招狂追超蓮，甚少出席名人活動的他，收風知超蓮會現身羅傑承投資的餐廳週年活動，當晚啟山罕有出席希望扮「偶遇」，可惜等了兩個鐘超蓮仍姍姍來遲，啟山才無癮走人。幸好皇天不負有心人，大前日啟山終得償所願，跟心中女神超蓮在廣州單獨撐枱腳，反勝聖誕日劉根森跟超蓮遊珠海時，身邊仍有幾位同行友人。

傾高球計劃

昨日記者聯絡超蓮，但至截稿前未獲回覆，其母三太陳婉珍的私人助理Sandy代回覆：「超蓮27號係上咗廣州，佢同啟山傾生意，因為何太喺廣州有高爾夫球場project，超蓮𠵱家幫屋企打理生意，嗰日佢哋係傾公事。」問到為何找啟山合作？她說：「霍家喺內地發展好耐，啟山幫家族喺內地發展生意，如果傾得成會公佈project。」問到超蓮和啟山是否拍拖？她說：「何太話一定唔係，佢哋係朋友、世交，唔係拍拖。」

採訪：唐如
from:http://hk.apple.nextmedia ... 151230/19431414

前日　澳門【四手交纏】
何猷君和Kimmy光速撻着，前日被本報讀者在澳門野生捕獲，二人又蹺手又十指緊扣，明顯在熱戀狀態。

賭王四房孻仔何猷君，前晚與西甲華倫西亞班主、新加坡百億富商林榮福千金Kimmy Lim同步在Ig公告戀情，本報讀者更目擊猷君和Kimmy前日傍晚在澳門十指緊扣行街，Kimmy小鳥依人挨實掃猷君背，冧到爆。另一邊，疑因劈腿被猷君狠撇的前度白緯玲（Yumi）則發功贈興暗寸猷君，擺出愛的反面就是恨。

現年20歲的賭王四房孻仔何猷君，上月疑因女友、新加坡女子組合By2成員白緯玲偷嗒內地小生孫祖君而分手，猷君貴為麻省理工尖子兼百億二代的「筍盤」，「復牌」不足一個月，即光速有新戀情，戀上23歲新加坡百億富商林榮福、西甲足球華倫西亞班主大女Kimmy Lim，二人前晚夾定時間齊在Ig公告戀情，猷君以一張面貼Kimmy的照片，肉麻地發表指環宣言，更封女友為「Princess Kimmy」，Kimmy則擺一張蹺實猷君手臂selfie相，冧到爆。

【肉緊互攬】
二人上扶手電梯，互相攬腰，認真癡纏。DV圖片

【挨膊撒嬌】
Kimmy如樹熊般將頭及手臂挨落猷君膊頭。DV圖片
蹺實逛名店

昨日本報讀者李小姐爆料指猷君和Kimmy前日下午5時多，在澳門壹號廣場shopping拍拖，在提供的片段中，猷君身穿白恤衫黑色牛仔褲，Kimmy也是黑色上衣襯星星圖案爛牛，當時Kimmy蹺實猷君手臂，兩人十指緊扣行Valentino、LV、Cartier等名店，其間猷君警覺地邊行邊望。二人之後上了扶手電梯，Kimmy即施嗲功，左手和頭挨落猷君膊頭，十足小鳥依人，猷君則攬實Kimmy纖腰，Kimmy又向猷君掃背及攬腰，兩人似「脆麻花」般連體嬰。

四房一家正在澳洲過元旦，記者昨日分別聯絡超盈及猷君，在截稿前都未有回覆，四太則指Kimmy是大女超盈的朋友，而從Kimmy的Ig圖片所見，她確實與香港富二代如超盈、林建岳細女林心兒及銀行家柯清輝契女嚴紀雯等稔熟。據悉，猷君近日放聖誕假返港，甩拖的他日日黐住超盈，陪開工到去party都跟住去，因此識到Kimmy，而Kimmy父親林福榮是個足球癡、更是西甲華倫西亞班主，她和猷君大講足球經而一拍即合。四太又說：「我從來唔問，佢哋都唔興話畀我聽，佢咁細個讀書先，朋友嘅嘢，最緊要相處。」

採訪：森遜

Kimmy前晚跟隨猷君在Ig貼相，更蹺實猷君宣示主權。

四太昨日回覆指超盈（左）與猷君新女友Kimmy是朋友，變相家姐是紅娘。資料圖片
From:http://hk.apple.nextmedia ... 160101/19434589

有圖有真相，何家千金超蓮撇甩吳克羣後，重新投入戀愛市場的她，身邊兵仔o氹o氹轉，就連城中超級筍盤霍啟山亦成為裙下之臣！

上個月尾(12月27日)，二人已經俾本報讀者喺廣州捕獲撐枱腳食中菜，事後超蓮同啟山封嘴，反而三太代超蓮解話，話佢兩個只係傾合作，純粹公事。不過奇怪嘅係，昨晚《蘋果》記者竟然又見到超蓮同啟山喺半島酒店嘆candle light dinner。事隔唔夠兩個禮拜，又嚟傾公事？仲要喺半島？又係單對單？呢勻三太都好難拆！

昨晩大概7點，有人目睹啟山同超蓮孖實喺尖沙嘴半島酒店一樓嘅Chesa嘆瑞士菜，由於餐廳冇VIP房關係，所以佢哋就同其他客人一樣坐大廳，亦由於佢兩個個樣太易認，附近唔少客人都認得，所以成餐飯，超蓮同啟山都只係排排坐，冇乜親暱動作。不過話晒後生仔女，食飯呢兩個鐘，超蓮同啟山都有傾有講笑唔停！最後食完埋單走人，咁呢啲粗重功夫就梗係要男仔做啦！

落到樓，佢哋離奇唔揀正門離開，反而喺側門冇乜人行嘅漢口道行出嚟，行前兩步嘅啟山周圍搵保母車之餘，超蓮亦雷射眼狂掃四周有冇記者，行到路口見到記者時，啟山尷尬笑，不過超蓮就面燶燶。雖然俾記者撞破「蜜事」，但啟山依然不失風度，安排超蓮先上自己保母車，然後自己才上車離開。

沿途保母車為撇甩記者，不下一次越過雙白線，險象橫生，過咗隧道去到中環碼頭，超蓮平時坐開嘅白色七人車忽然喺路中心閘住記者架車，跟住啟山架車就消失蹤影！
from:http://hk.apple.nextmedia ... 160112/19448585

【同車離開】
超蓮與啟山燭光晚餐後齊齊上車離開。

賭王千金何超蓮繼早前獨自與霍啟山在廣州「傾生意」後，前晚二人又再度蜜會！晚上約7時許，兩人現身尖沙嘴半島酒店的Chesa嘆燭光晚餐，由於餐廳沒有VIP房，兩人與其他客人一樣坐大廳，着黑西裝的啟山和粉紅衫襯短裙的超蓮並排而坐，兩人在浪漫燭光下喁喁細語。

【笑容尷尬】
發現記者後，超蓮表現尷尬。

【女士優先】
啟山展現風度，讓超蓮先上座駕。

側門離開四圍望

早前超蓮被拍到與內地百億富二代劉根森同遊樂園，不過超蓮再與啟山撐腳枱，真命天子似乎呼之欲出！前晚兩人在餐廳內被不少食客認出，啟山和超蓮十分謹慎，沒有好似司馬燕前夫吳忠義般，與新歡在餐廳又攬又啜，兩人沒有任何親暱動作，但共度晚餐的兩小時內，他們都有傾有講笑不停，明顯好啱嘴形，約9時左右，由啟山負責埋單離去。

他們搭𨋢到酒店大堂後，並不是由正門離開，刻意揀側門少人出入的漢口道，首先步出的啟山負責搵保母車停泊的地點，醒目的超蓮就四圍贒，行到路口時發現記者，被撞破好事的啟山露出尷尬笑容，超蓮則抿嘴面燶燶，記者連問：「係咪正式拍拖？」、「有冇發展機會？」兩人都不發一言上車離去。而司機為撇甩記者追訪，竟連環越過雙白線，過隧道去中環碼頭後，超蓮的白色七人車忽然在路中心攔記者車，讓啟山和超蓮成功逃脫。

超蓮昨日貼上一張做運動後的照片，大晒纖腰。互聯網圖片

啟山前晚相約超蓮在半島酒店的Chesa撐枱腳。互聯網圖片
「普通社交食飯」

昨日問超蓮是否跟啟山拍拖？她表示只是普通社交食飯，好姊妹李蘊則代否認：「100％唔係拍拖，總之信我啦，佢真係單身，以我所知佢哋係朋友，你哋再寫佢就冇人追㗎啦，你哋害佢變老姑婆！」對於女兒與啟山撐枱腳，三太何婉珍助手Sandy昨透過電話表示：「年輕人食飯好普通，何太冇回應呀，唔該。」

採訪、攝影：黃曉程、潘冠恩、朱志聰
from:http://hk.apple.nextmedia ... 160113/19449051

【前日台北】

超蓮與啟山雙方家底過百億，前日在台北板橋市幫襯平民牛肉麵食店。

賭王三房最索千金何超蓮回復單身後，與霍震霆二公子霍啟山行得最密切，前日與啟山第四度斷正在台北過周末，一起去食平民牛肉麵，據知超蓮的台灣歌手舊愛吳克羣戒食牛十多年，超蓮啟山此舉難免給人覺得「去踩場」。超蓮昨日接受本報訪問時，例牌強調自己是單身，與啟山出埠，就解釋是有一大班朋友去旅行。

賭王三房最索千金何超蓮去年12月淚斬與台灣歌手吳克羣的四年情，男方傳與女模相戀，超蓮在分手後也不愁沒人追，24歲的她身邊就出現追求多年的霍震霆二子霍啟山、內地百億富二代政協劉根森等高富帥，當中獲三太陳婉珍開綠燈拍拖的啟山較佔盡上風，但遭超蓮否認。

【二人世界】

超蓮表示因不夠座位，她與啟山被分配坐兩人枱，朋友坐隔籬枱。

DV圖片

【食到笑晒】

啟山與超蓮在擠逼食店進食，不但不覺侷促，而且還很好笑容。

【毫無架子】

超蓮自動波在店內行出行入取食物。

超蓮對着一大碟鍋貼食指大動。微博圖片
前日有台灣《蘋果日報》讀者提供超蓮和啟山在台北旅行的相片，穿着黑tee牛仔褲、戴黑超的啟山與穿棗紅衞衣的超蓮，現身板橋市一間平民牛肉麵店，啟山全程笑笑口負責食，超蓮就顯然是食店的常客，在店內跟老闆熱情打招呼，更行出行入攞食物，但不忘警覺地望周邊氣氛。其實之前二人已被爆在廣州及香港半島酒店撐枱腳，超蓮更曾帶啟山見好姊妹鄧紫棋和李蘊到中環Sevva食飯，今次第四次斷正，盡顯二人密密見「好友」關係。

超蓮1月底在台灣醉酒，由舊愛吳克羣照顧送返家過夜，惹來復合傳聞。

台灣《壹週刊》圖片
舊愛不食牛

超蓮是台北常客，1月底在當地與友人飲酒飲醉後，其朋友卻召來其舊愛吳克羣帶她返家休息照顧，據悉，超蓮事後表現無奈及不悅，今次與啟山重臨，並帶男方去常幫襯的食店嘆牛肉麵，須知道吳克羣戒食牛十多年，超蓮和啟山此舉可謂踩場又贈興。

本報昨日致電仍身在台北的超蓮，問她與啟山去台北擦牛肉麵，會否令人覺得有踩場之嫌，她大方回應：「我每個月都會去台灣，睇牙醫喺嗰面，咁啱呢次有朋友生日，都幾多香港人去咗，我又好熟台灣嘢，我做導遊，唔係乜嘢踩場，冇乜特別。」她透露今次純粹是朋友生日旅行團：「成班朋友去旅行，有好多人，我帶佢哋去食嘢，全部一齊去食，除咗霍生，仲有其他香港朋友，亦都有兩個台灣男仔，一個台灣女仔，成團有七、八個人，因為太多人唔夠位，我同佢坐一張枱，因為係兩人枱，所以咁樣，總知好多人一齊，唔係單獨，同埋佢唔係我男朋友，我澄清多一次，我哋係朋友關係。」

超蓮昨日在Ig和微博貼上與大班朋友遊台的相片，但「團友」啟山卻被消失。

啟山被避嫌

問到現在的感情狀況，與啟山會否有發展空間，超蓮就表示：「我𠵱家係單身，但我想畀心機做嘢，所以唔諗拍拖啦，短期內都唔會拍拖，全部都係朋友關係，唔係情侶，我唔知人哋有冇追我，唔關我事。」至於吳克羣回覆台灣《蘋果》時，表示不知道超蓮來了，也不認識霍啟山。

之後，超蓮即在微博貼了多張與一大班朋友的飯敍相如打邊爐，亦有與啟山食牛肉麵的食店食物及友人相，惟獨啟山未有「入鏡」，超蓮留言說：「來個兩天吃了這麼多哈哈哈哈。」

採訪：唐如
from:http://hk.apple.nextmedia ... 160307/19519132