記者穿着裝備時，未開始緊張，仲好好笑容，稍後行到崖邊準備起飛時，就真係有點腳震！
只要你冇畏高症，有夢想，就一定要試下滑翔傘。
相比起摺合式單車，開支其實唔差好遠，但感受完全不同。
我冇飲red bull 都有對翼！
阿傑玩了滑翔傘9 年，每逢放假，他晨早起牀第一件事是上網睇天氣，若風向、風速啱，就立刻揹起傘袋上山去飛。他喜歡與人分享飛的樂趣，只要你有興趣夠膽量，未正式學之前，可以請阿傑先載你飛一轉，純粹做乘客，體驗一下。
夠秤才可以飛天
約阿傑載我飛天，他第一個問題唔係問我幾多歲、體能或者有冇畏高之類，而係「你夠唔夠秤」！做乘客基本上不限年齡，但有體重限制。雙人傘負重須介乎140-220kg ，太輕太重都唔得，而阿傑體重約70kg ，加上坐袋、附加的座椅和其他裝備約30kg ，即乘客起碼要重40kg 以上。我有45.5kg ，啱啱好夠重。
乘客不用特別裝備，穿長褲、行山鞋，戴埋頭盔便可。在半空中，乘客毋須協助操控，乖乖坐定睇風景就是了。不過阿傑說，有些人可能會暈浪，因為會有點坐船在海中漂浮的感覺，「當你感到暈眩時，眼望遠景或者拍下DV 分散注意力，都會覺得冇咁暈。」阿傑會提供腳架和DV 機供乘客在半空自拍，還免費將影片e 番俾你留念，真係夠晒體貼！
上山 滑翔傘有別於跳降傘，冇飛機載你上半空跳下來，而是全靠自己揹着裝備行上山，然後靠山邊氣流乘風起飛。因此玩傘就先要行山。
測風速和風向 起飛地點在山崖邊，因要借助吹向山崖的氣流帶動起飛。風要向崖吹，風速最好是微風，2-3 級最合適，太細風個傘會飛唔高，甚至被逼降落山下，太大風則會失控。
開傘 攤開傘，飛行員檢查及整理好傘線，乘客穿好裝備，就可到崖邊準備起飛。
起飛 飛行員看準氣流乘風張開傘翼，控定後，轉身向山崖跑幾步一躍而下就起飛喇。乘客要配合飛行員，聽從指示一起開步跑，以及離地後甚麼時候坐上座椅。
降落 如果風速保持2-3 級，飛行員可操控逗留半空半小時以上，玩夠了就原地降落崖上。安全降落，完成難得的飛天體驗，請在頭盔上簽個名留念！
我們起飛了！
裝備開支
初投入滑翔傘運動，基本裝備開支約$25,000 ，之後沒有經常性開支。滑翔傘只要不破損，可用上5 至8 年。
傘：$12,000-$15,000
坐袋：$3,000
後備傘：$3,000
飛行服：$1,000
頭盔：$1,200-$2,000
飛行儀器：包括指南針、高度計、衛星定位儀，合共約$2,500-$7,000
查詢：可請導師在海外訂購，另香港滑翔傘協會網頁有二手交易欄，也可找到二手貨。
學飛之路
滑翔傘執照分兩級，「Student Pilot 」學習基本飛行理論、起飛、降落等技巧，筆試合格並完成12 次定點降落便可獲執照。高一級的「Club Pilot 」由導師帶領學習實戰飛行技巧，例如使用氣流上升、大風或微風時起飛、原地降落（toplanding ）等，經考核合格便可獲第二級執照，就可以「自己飛」。
香港現時有2 名合資格導師，第一級課程收費每日$1,000 ，約4 、5 日完成，學費包括租傘和所有裝備。第二級課程建議學員自購傘練習，導師會協助學員熟習滑翔傘的特性，課程約2 、3 日，收費$4,000-$5,000 。
本地滑翔傘導師
查詢：9620 0577 （文錦輝）
9450 0851 （Steve Yancey ）
女玩家：飛多一、兩次就唔驚
香港玩滑翔傘的女仔唔多，Catherine 玩了2 年，已是狂熱分子，每逢放假，碰上風向、風速啱，就會立刻去飛。她說女仔唯一輸蝕的是體能，「每次先要揹住約20kg 裝備上山，的確幾吃力，但其他方面就沒有太大分別。可能女仔比較細膽，所以少人玩，我初玩時，飛高過山頂都會好驚，但飛多一、兩次就唔驚啦！」
半空中鳥瞰西貢景色，好爽呀！
記者試飛 寧靜舒暢迎風去
飛天當日，風速超過3 級，稍嫌過強，阿傑話「今日飛要等」。等咩﹖等風轉弱。阿傑話一般午後風速都會轉。等待期間，有其他飛行員冒着有點大的風去跟風角力，場面有點驚險，令我原本輕鬆的心情添上幾分緊張。2 小時後，我們終於可以起飛。穿上裝備站到崖邊一剎，話唔緊張就呃你，但起飛的過程好快，聽到阿傑大嗌「跑」，我就跑，不到一秒已經雙腳離地。我以為半空會好大風，但原來風好輕柔，迎着風飄來飄去感覺好寧靜舒暢。鳥瞰西貢的景色更加毋須我多加形容，睇相啦！
滑翔傘載客服務
有興趣人士可先到阿傑的網頁了解飛天的資料，然後聯絡預約。阿傑提供所有裝備，但乘客要負擔運送裝備來回場地的士費，約$500。另乘客需自購保險。
網址：
http://www.hongkongpilot.com
電話：9183 1885
8 大滑翔傘場地
民航處劃出8 個滑翔傘飛行地點，包括浪茄灣、西灣、北潭坳、八仙嶺、馬鞍山、石澳及東大嶼山、西大嶼山。
