香港地方淺窄係人都知，放假想去郊外靜下咩？遇到班行山打卡黨真係咩心情都冇曬，但係如果玩滑翔傘飛上700米高空就唔同喇！唔使同人逼之餘，仲可以飽覽無盡嘅海景，不過就要有些少體力同膽量先好玩。
記者：黃芷蔚 攝影：馮峰、吉吉、Neo
滑翔傘基本裝備
大嶼山山景真係好靚！
沿途會穿過雲層
第一次玩滑翔傘就梗係冇得自己飛啦！只可以玩雙人傘，由教練控制個傘同你一齊飛。香港有8個政府認可玩滑翔傘地點：大嶼山、浪茄灣以及石澳等等，今次嚟到大嶼山，屬於大東山地段，要揹住裝備行20至30分鐘上山，都咪話唔辛苦！
除咗體力，玩滑翔傘最緊要就係耐性，天朗氣清就一定飛到？太天真喇！起飛仲要睇風向風速，吹東風的話最好飛龍脊同馬鞍山，今日吹西南風所以我們飛大嶼山，教練麥sir話：「睇風好似睇女朋友咁，風依家OK，但我哋再唔起飛，過15分鐘就未必得㗎喇！」收到！咁起飛喇我哋！
喺長沙沙灘降落
想要個有型降落都要有啲腳力，Yvonne話要superhero landing喎！
滑翔傘基本裝備有座袋、頭盔、護膝、手套同埋GPS儀器。初學者多數去有平原嘅浪茄灣練習，但今次動主播Yvonne就挑戰屬於中級難度嘅大東山，希望一飛出去就見到無敵大海景。雙人傘起飛時，乘客（即係Yvonne）要配合教練指示，勇敢地跑出去幫助起飛。講咗咁耐，其實每次雙人傘都係飛大概15至20分鐘，盛惠$1400，不過好似今次咁，可以鳥瞰大嶼山景色，喺長沙沙灘降落，都算值得嘅！
試飛服務提供：X-Fly香港滑翔傘學會
from:
http://hk.apple.nextmedia ... 160826/19750000
