《東張》改革後會炒晒一班舊人，好似黎芷珊、宋芝齡、李浩林、蘇晉霆等無一幸免，改為加入一班落選港姐及死剩種崔建邦，而Amigo 亦好識做咁當張慧慈係女王咁恭迎。
人紅自然囂得起，繼煮餸煮到跳槽嘅蘇施黃後，曾喺亞視同有線做主播嘅張慧慈，傳聞話袋咗成百萬，為週一開始血洗嘅《東張西望》做主持，拍住唯一留低嘅陳總愛將崔建邦，擔正大旗。
早排張慧慈以港女姿態亮相《星期日檔案》被網友插爆佢係正宗「港女代表」，不過有大台撐使乜驚，上週四，佢以《東張》一姐孖住Amigo 喺變革會滿場飛，上台時企正監製張嘉玲旁邊，而且張監製仲大讚：「我覺得張小姐一定可以令『東張』更pro 更好睇。」而張慧慈跳升做張主持後，即刻由「中肯」嘅記者變成「吹水」主持：「TVB 係大台，本身已經好吸引啦，所以絕對唔關薪酬事，而且我係現實同夢想主義者，我會喺當中取個平衡，將主持呢個職責發揮到最好。」
乜講到自己好似世外高人咁。嗱，FBI 有睇吓網友大數港女嘅「89 」宗罪㗎，其中一項就係「扮高檔」噃！既然錢唔係問題，畀番份人工你老公好喎！
自豪港女
95 年喺浸大中文系畢業嘅張慧慈喺亞視已經有主持經驗，仲有亞洲之花稱號。
張慧慈一過檔，即主動上前碼實無綫電視非戲劇製作總監何麗全，深明襟撈之道。
最近張慧慈喺《星期日檔案》以港女身份帶埋老公（右）做訪問，發表男人要畀晒所有錢女人使嘅言論，佢老公係人辦。被網友喪鬧佢「正一港女」，不過佢解釋：「我呢，只係香港女性，並唔係港女，我只係講我同我老公之間嘅綿綿情話及相處之道，我唔會理呢啲批評。」
