《崖上的波兒》俾人喪鬧，好哋哋搵隻可愛波兒冧吓女咪夠囉，又走去講啲似是而非嘅環保大道理。
唔想用腦？不如改玩迪士尼新作《3D 超級零零狗》電影遊戲；你要輪流控制超能狗同小特務，大玩特務潛入+狗狗鬥一番，少少解謎、多多action ，啱晒睇慣「成龍賀歲片」嘅你！
名稱：《Bolt 》
類型：動作
機種：XBox 360
廠商：Disney
人數：1 至2 人
售價：$318
人狗大不同
《零零狗》其實係講一隻自以為真係有超能力嘅狗演員Bolt ，點樣救番佢個主人，但遊戲版唔會咁複雜，而係直接改篇其「戲中戲」，操縱少女特務Penny 同超能狗Bolt ，一版一版咁殺入惡黨大本營。有趣嘅係，人/ 狗兩個模式玩法係南轅北轍，做人時一定要隱身潛行，玩法有點似《Metal Gear 》，而做狗時卻有強大殺傷力，直升機、大炮都照咬！
Bolt 能力最強時可射出「狗眼laser 」，火箭都射穿。
以X 掣作連續攻擊，對手就會見頭暈，並出現一粒紅色B 字，此時埋身按B ，再按指令就能夠一擊KO 敵人。
不斷連hit combo 殺敵，就可以儲滿雷電計，放出極強嘅「超狗吠」
狗攻篇
基本都係邊行邊跳（A 掣），再用X 掣作肉搏攻擊，殺到咁上下儲夠超能力（綠色珠珠），Bolt 的超能力就會一級級咁醒覺，比如「超狗吠」可以震碎障礙物同敵人。筆者自己最喜歡Bolt 仔的連續攻擊，可以控制佢攻擊一名敵人，再跳到下一個目標身上，連殺3 人都狗不著地。比之前任何一款迪士尼卡通改篇作都要爽快。
出場時玩潛水，又戴晒夜視眼鏡，好鬼死似蛇叔。
小特務Penny 支爬行鐵臂唔只用來爬牆，仲可以攻擊、開鎖、開機見到任何機關上有個紅B logo ，埋去按掣就有反應。
按RB 就能夠隱身，可以埋身加多下X 暗殺對手，缺點係需要大量電力，一斷電就會現形。
按Y 掣就可以開動夜視鏡，任何可以使用爬行鐵臂（按B 掣）穿過嘅地方，都會用黃色表示，等初玩者唔怕搵唔到路玩落去。
潛入篇
雖然電影主角係Bolt ，但我個人就認為Penny 嗰part 更有心機。呢個女仔裝備有夜光眼鏡、隱身衣、爬行鐵臂，動作7 成似蛇叔，版圖設計仲畀咗心機，好多位都要玩家用吓腦筋，自己搵出解謎過關之法。唔似一般電影game ，幾多個主角都係換湯唔換藥，後期更需要兩個主角，互補不足，好食腦。
總評︰簡單唔代表簡陋
《Bolt 》算係近期做得最似模似樣的電影game ，雖然打法流於簡易，打多3 至4 版會覺得單調，但簡單唔代表簡陋，呢隻game 真係畀咗心機去做，例如第3 關hack 入電腦時會變成70 年代retro feel 射烏蠅機（見圖），左analog 移動，右analog 射擊，單係呢啲mini 已經有排你玩。
