今日係大除夕，每當呢個時候，特別多人玩占卜、睇運程，無他嘅，都係想知吓嚟緊一年有冇運行，趨吉避凶。正所謂「風水佬呃你十年八年」，但喺財經界玩預測，通常一年就知中唔中，《商業周刊》最近整咗個「2008年最差預測」，將各方名人對08年嘅預測嚟個大檢閱，順便拆佢哋招牌。排頭位嘅係美國Profitable Investing Letter 編輯Richard Band ，佢喺今年3月27日向股民建議：「股市將會出現一次非常強勁同持久嘅反彈，但可能要幾日時間先出現。大家應該堅守陣地、保持信念！」佢講呢番話時，道指仲喺12300點，但前晚收8483點，由年頭起計，累跌36%。咁呢個反彈到底仲有幾多日先出現呢？
兩房穩健樓價趨升？
估錯市又點止得Richard Band ，美國投資公司Friedman Billings Ramey 嘅分析師Bijan Moazami ，今年5月9號話：「美國國際集團（AIG ）將會喺第二季度實現巨額盈利」，結果AIG 第二季度錄得53.6億美元虧損，9月仲要美國政府出手拯救。股市估唔到，樓市仲難估。美國國會眾議院金融服務委員會主席Barney Frank 喺7月14號話：「房貸美同房利美基礎穩健，冇破產危機」，估得有幾差，唔使華華多講啦，吓嘩！同樣估錯樓市嘅仲有美國全國房地產經紀人協會，佢哋舊年12月9號出咗份新聞稿，當中有一句係「08年住宅現樓銷售量將趨升」。做經紀，對樓市梗係唱好唔唱淡嘅，不過，今年12月過個協會出咗啲數據，美國11月房屋銷售量比年初跌咗11%。即係咁，如果俾佢哋估中，就唔會有金融海嘯啦！李華華mailto
iWaWa@AppleDaily.com
From:http://appledaily.atnext.com/template/apple/art_main.cfm?iss_id=20081231&art_id=12033547
AIG 前CEO 沙利文：又唔係我估會大賺，我都執包袱走人啦，仲想點喎。（設計對白）
From:http://appledaily.atnext.com/template/apple/art_main.cfm?iss_id=20081231&art_id=12033547
