一向新聞多多的08年港姐冠軍張舒雅，自參選以後，負面新聞一單接一單，早前更傳她以情緒病為理由，向無線申請退選《2009國際中華小姐競選》，誰知「患病」中的張舒雅，日前精神奕奕地現身與家人晚膳時，卻堅稱自己冇病，擺明不將無線放在眼內，無線製作資源部總監樂易玲昨日終於忍不住開腔，指張舒雅不懂人情世故。
無線製作資源部總監樂易玲昨日出席在尖沙嘴舉行的「香港女童軍名人慈善競技2009」記者會時，談到有指張舒雅因退選而遭雪藏，樂小姐說：「我唔清楚佢係咪俾公司雪藏，但係我都冇聽講過要雪人，外事部都已經回應咗，話佢係因為身體唔舒服退選（指《2009國際中華小姐競選》）。我本身同佢唔熟，只係喺活動同港姐面試時見過佢幾次，佢係一個細蚊女，唔識人情世故同講嘢，不過人就冇乜機心。」提到張舒雅曾說「唔習慣工作咁緊逼」，樂小姐對此說：「參選港姐只係得好短嘅時間訓練人表現最好一面，我都有聽過佢呻辛苦。」
「唔識人情世故」
張舒雅由參選至今新聞多多，有損港姐一貫的形象。資料圖片
問樂小姐是否覺得張舒雅不聽話？她說：「唔可以咁講，佢只係唔識得人情世故，冇乜入世經驗，可能佢屋企太錫佢，心疼佢捱得咁辛苦，呢啲除咗佢本身嘅鬥心外，屋企人都好重要，如果冇鬥心出場都贏唔到。」又問到樂小姐是否認為張舒雅開了先例，以後只要有醫生紙就可以推工作，她則說：「佢唔係我嘅部門（藝員部），不過藝人接job 之前知道要做啲乜嘢，同要面對啲乜嘢，呢啲係對公司嘅承諾，唔係因為一張醫生紙就推job 咁冇責任感，而且仲會影響製作。」雖然有不少人認為張舒雅因為身家豐厚而無心工作，但樂小姐並不認同，她說：「好多藝員都係有家底嘅人，但係佢哋都好志在份工，好似林峯都好有家底，不過佢都捱到隻屐咁，做少啲都唔得，呢啲只係睇個人有冇鬥心，既然佢都冇鬥心，不如搵個有鬥心嘅人代表香港，爭取好成績。」
陳倩揚隨遇而安
陳倩揚被笑指天生勞碌命，半年三度參加選美，難得她隨遇而安。
樂小姐之後又大讚同場的港姐季軍馬賽，她說：「馬賽參加國際小姐嘅時候，明知身材輸蝕過其他人，不過一直都好落力同有鬥心。」馬賽得悉被樂易玲稱讚感到很開心，她還賣口乖說：「多謝樂小姐讚我，我都係做好份內事，公司對我哋有期望，唔可以辜負佢哋。」高海寧就表示未有跟張舒雅電話聯絡，但她力撐張舒雅好積極及認真。另外，亞軍陳倩揚昨日在電視城綵排國際中華小姐時，她表示知道張舒雅身體已沒有大礙，但至今仍未與張舒雅聯絡，對被笑指為勞碌命，在半年內參加三個選美，她則笑說一向隨遇而安，只會努力做好自己。採訪、攝影：楊潔雯、何慧斯
樂易玲昨日明寸張舒雅冇鬥心兼不懂人情世故。
FROM: 頻果日報
