今年無線台慶頒獎禮，阿佘（佘詩曼）半個獎都冇，作為一線花旦又真係幾失威，加上連日趕拍《法政先鋒2》，阿佘皮膚變得又殘又乾，面上仲生咗粒大毒瘡，都咪話唔黑仔。
不過上周六（11月24日）佢響《新城勁爆兒歌頒獎禮》可謂威番次！不但一人連嗱兩個大獎，包括「兒歌女歌手獎」及「年度兒歌大獎」，仲有高層樂易玲撐場，都算嗱番個彩。
席間，阿佘同樂小姐不斷企埋一邊吱吱噚，樂小姐對阿佘又讚又呵，阿佘當堂冧晒。除咗阿佘，今年飲恨女飛躍獎嘅廖碧兒，一樣得到樂小姐嘅眷顧，反而同場嘅胡杏兒就明顯被冷落。見微知著，來年邊個花旦有機會發圍，有眼你睇啦！
頒獎禮中，雖然還有廖碧兒、胡杏兒、鍾嘉欣等花旦，但樂易玲全程獨攬阿佘，足證阿佘地位的確超然。
見到阿佘住紅衫，樂小姐話︰「個獎同你件衫好襯，一樣咁紅！」
有高層傍住，阿佘意氣風發話︰「新城繼續勁爆，我阿佘都繼續勁爆！」講得冇錯，阿佘面上嗰粒瘡就真係爆到七彩，要用成擔粉先至遮到。
一隻手搭實阿佘膊頭唔放嘅樂易玲，另一隻手就招手叫其他藝員埋去影合照。
得到樂易玲呵番，眾人的笑容中，阿佘笑得最燦爛。
同樣響TVB 台慶食白果嘅廖碧兒，就主動埋去同樂易玲握手，多謝佢幫手響新城爭番個獎。
乖女，錫番晒！（設計對白）
知道我係寶哩！（設計對白）
忽然一周第644期
如果您喜歡這篇文章，請按「讚」或分享給您的朋友，以示鼓勵。
