家陣呢個世代，離婚是平常事，雖然曾經失敗過，但回復單身後嘅生活，絕對可以更精采！
好似近排成為城中熱話嘅蔡卓妍（Sa）咁，佢同鄭中基06年秘婚，到10年離婚嗰日至爆大鑊，喺記者會上兩個喊到眼紅紅咁。兩人分道揚鑣後冇乜機會同場，但各有各精采，鄭中基就娶咗有線前主播余詩敏，婚後育有一子一女，而阿Sa呢，雖然仍然保持單身，但繼「的士陳」之後，近日同「麻將館大王」太子爺石恆聰（Anthony）熱戀，佢以一句「o依家好開心」嚟默認，又被《蘋果》讀者影到佢哋蜜遊東京，sweet到漏！
至於選美出身，曾獲選2005年華姐亞軍嘅陳法拉，喺06年嫁畀Neway太子爺薛世恆，但婚姻維持至13年告終，離婚後嘅法拉繼續發展演藝事業，但佢約滿大台之後，疊埋心水去美國紐約進修，仲入讀著名學府茱莉亞學院嘅戲劇碩士課程，舊年一度返港，孖住男神黃子華演舞台劇《前度》，舊年仲有報道指佢喺朋友介紹下，識咗個曾任法國駐日外交官EMMANUEL STRASCHNOV，而法拉為咗保護呢段戀情，決心低調處理。
昔日「寶麗金小花」黎瑞恩（小恩子）於02年嫁俾金利來三少曾智明，婚後退出娛樂圈專心相夫教子，可惜兩人婚姻疑因男方包養小三而劃上句號。14年小恩子回復單身，喺舊唱片公司同事邀約，加上女兒支持下，再踏入錄音室，舊年更正式復出，得閒做吓演唱會嘉賓，早前更以投資者身份，投資落林敏驄作品展；另一方面，佢仲要照顧一對仔女。
from:
http://hk.apple.nextmedia ... 170713/20088207
