英格蘭快翼史達寧喺今屆世盃表現成為熱門話題，家陣普遍意見兩走極端，大量網民都恥笑佢得個走字，埋門把握力差，喺今屆仲未入過波，完全孭唔起英格蘭「10」號波衫。不過，包括已經做咗講波佬嘅英格蘭名將加利尼維利在內嘅英國媒體專家都分析認同，史達寧喺「三獅兵團」前線作用巨大，係戰術關鍵，就連嚟緊4強會對英格蘭嘅克羅地亞領隊達歷都話，史達寧係英格蘭前線最大威脅，真係信不信由你呀！
「加利佬」認為球迷對於史達寧喺對瑞典場波完半場前錯失兩個單刀機會，係難以接受嘅失誤，但呢位曼聯名將始終認為史達寧喺球隊作用，絕對唔止係處理臨門一腳。事實上，包括喺《天空體育》同《每日電訊報》等撰文嘅分析都指出，史達寧嘅速度同走位，都係英軍陣內無人能夠取替，佢既能夠喺前場幫助隊長哈利卡尼引開對手，又能墮後攞波策劃攻勢，再畀空位隊友連格同迪利阿里等後上插入，令到球隊進攻戰術更多變。
再講，史達寧嘅勤力程度，又係其他隊友無可比擬，睇番數據（見表），史達寧喺對瑞典場波全場有46次衝刺，係兩軍最多一個，就知佢嘅搏命程度，以及對球隊貢獻啦！克羅地亞主帥達歷喺今場賽前講過：「我認為史達寧會係佢哋最重要球員，佢速度高，同哈利卡尼嘅組合相當具威脅，佢哋能夠輕鬆搞掂瑞典，絕對係個難以應付對手，值得我哋尊重。」達歷仲話會趁兩日休戰空檔做好研究，希望畀到對付史達寧同英軍鋒線方法嘅資料畀克羅地亞嘅防守球員喎，果然認真！
http://football.on.cc/cnt ... amp;whichpage=1
