心美雖然名花有主，但昨日仍堅持要圍住桃花行三圈，希望來年有桃花運。
年宵市場昨日開鑼，ViuTV一姐黃心美昨日率先到維園行年宵湊熱鬧，引來途人瘋狂集郵。雖然心美已名花有主，但昨日仍堅持圍住桃花行圈，她說：「希望喺狗年繼續行多啲桃花運！」至於憑網劇《反黑》人氣大升的張建聲，昨日帶同女友陳嘉莉到老闆蕭定一的維園年宵檔叫賣，更即場咀嘴，即使未到情人節，已經甜蜜蜜。
農曆新年將至，維園年宵市場昨日開鑼，ViuTV一姐黃心美相約公司旗下藝人駱振偉和詹朗林一起逛年宵。由於新一年是狗年，三人齊齊睇狗年特色物品，如狗頭咕𠱸。之後三人又轉風車和品嚐懷舊小食，包括冰糖生果和烤魷魚等，其間有小食攤檔檔主更打開雪櫃讓三人任食，又有攤檔送上小禮物，心美此行又食又拎，可謂大豐收。
黃心美、駱振偉（左）和詹朗林對桔甚有興趣。
黃心美行年宵時，不斷被集郵，甚受歡迎。
有不少攤檔送上美食，心美、詹朗林認真有口福。
初一着新拖鞋
雖然心美去年宣佈有新男友，但她昨日仍要睇桃花，並堅持圍住桃花順時針行三個圈。心美說：「做娛樂圈要有桃花，所以我都希望喺狗年繼續行多啲桃花運！」心美透露年三十晚會出發去旅行，而問到農曆新年習俗，她說：「年初一當日落床一定要着新拖鞋。」詹朗林就表示今年年初一是他的生日，所以當日一定會食九大簋，又可以收雙倍利是。駱振偉就表示初一會食齋，到初二就會食九大簋。
身為「宅男女神」的心美，昨日行花市時，被途人瘋狂集郵，有人大讚她真人比上鏡靚女，逗得心美十分開心說：「今次真係好開心，好多嘢都唔使錢，不過我哋見到好多後生仔自家設計，所以應該支持吓佢哋！」
另方面，張建聲去年憑網劇《反黑》「招積」一角人氣勁升，其公司HMV數碼中國集團今年在維園擺攤檔售賣「招積」模樣咕𠱸和手機殼，姜文杰也為《反黑》製作的啤牌和T恤販賣。張建聲昨日與姜文杰到維園攤檔叫賣，二人女友陳嘉莉及李泳淇也有撐場，其間張建聲跟女友陳嘉莉當眾錫錫，認真甜蜜。張建聲連番多謝老闆蕭定一投資，笑言賺到錢就自己袋，他說：「今日開咗單㗎喇，都好大壓力㗎！清唔晒就自己攬，盡可能會每晚都抽時間落嚟。」
張建聲（右二）跟女友陳嘉莉錫錫，姜文杰亦與女友李泳淇甜蜜蜜。
（右起）張建聲、李泳淇與姜文杰落手落腳宣傳貨品。
讚《反黑》奇蹟
問張建聲會否開拍「招積」的外傳時，雖然他表示要問導演宋本中，但就大爆說：「第二季努力寫緊劇本，因為第一季有啲唔完美嘅地方，要花啲工夫喺劇本上。今次會有荷李活演員參與，但唔可以透露住，Netflix會投資支持第二同第三季，製作上會大啲。」張建聲形容今次《反黑》是奇蹟，一於用本土班底做好本地創作，又揚言《反黑》是他的一生。今個情人節，張建聲表示會拉埋女友到維園睇檔，又笑說姜文杰會向女友求婚，但姜文杰就反擊笑指張建聲會結婚。
採訪：何慧斯、羅慧敏
攝影：陳慧安
【人氣急升】《反黑》衝出亞洲
現年34歲的張建聲模特兒出身，現為蕭定一的中國3D數碼娛樂公司旗下藝人，入行七年曾拍過《3D肉蒲團之極樂寶鑑》和《一路向西》等三級片，至15年為演出電影《壹獄壹世界：高登闊少踎監日記》，張建聲特地增肥30多磅，演出開始受人注目。
至去年張建聲在網劇《反黑》（圖）飾演黑幫狂人「招積」人氣大升，該劇內地點擊直逼17億，張建聲憑該劇獲得Yahoo人氣網劇角色，而該劇並已衝出亞洲，於本月5日在Netflix上架。
