喺大台默默幹咗八年嘅楊潮凱，最近喺《降魔的》番外篇終於登上男一，雖然口碑冇電視播嘅版本咁受注矚，不過楊潮凱嘅演出，一樣得到網民讚。大結局出現嘅一首插曲《宿命》，更加令人對佢刮目相看。事關呢首歌，楊潮凱唔只主唱，仲係作曲填詞，估佢唔到呢個大台藝員，原來係唱作人一名。
楊潮凱個處男mv，有老友鄧佩儀幫拖拍攝。
臨尾出場嘅傅嘉莉係彩蛋。
十年前楊潮凱已經有首唱作作品。
又彈得一手好結他。
十年前，佢同一班band友出過一隻雜錦碟，其中《烏托邦》係佢嘅作品。
一手包辦曲詞編唱，全能。
多年前佢拍《天與地》，已經發揮佢彈得一手好結他嘅專長，呢個多才多藝嘅楊潮凱，當日係城大創意媒體學院嘅學士生，畢業後一度去美國深造，不過因為家庭經濟壓力，不得不放棄留學，返港工作。入行前佢同朋友夾band，仲跟一班人出過一隻雜錦碟，當年佢已經有首作曲填詞兼主唱嘅作品，叫《烏托邦》。
之後入大台由低捱起，做到今日終於重拾出歌夢想，十年後再創作歌曲，最近仲將《宿命》拍埋MV，有鄧佩儀幫拖做女主角，臨尾有彩蛋，就係傅嘉莉客串演出。
