甄澤權變出超強人氣

甄澤權（Louis）孭飛嘅魔術節目《終極街頭魔法王》，早排喺無綫播出，雖然冇再發生「穿崩」事件，但係仍然畀人話佢涉嫌抄襲，其中一個變扭計骰嘅魔術，同舊年《全美一叮》一個參賽者嘅魔術表演，幾乎一模一樣。另外，仲有網民話啲現場觀眾好假，似係造媒，仲有就係主持之一嘅何雁詩，性感搶去唔少fo，搞到Louis畀佢搶晒鏡。
不過，批評還批評，被譽為「港版大衛高柏飛」嘅Louis，知名度同人氣都因為呢個節目而大大提升。早排，東姑喺旺角見到佢，喺街頭拍一啲魔術短片，仲要係超旺嘅行人專用區出現，Louis忽然變咗超級巨星咁。無論大媽、大叔、學生、小朋友，老中青都搵佢影相，連擺緊攤位做活動嘅，都放低晒手頭上嘅嘢，停工同佢影番合照先，可見Louis相當受歡迎。
Louis變魔術就話神乎其技，成日可以三頭六臂，但係同粉絲合照，佢就真係唔識「分身術」喇，所以後來惟有一大班人影團體合照，代替逐個人每人影一張，以應付粉絲嘅徇眾要求喇！

之前播出嘅《終極街頭魔法王》，Louis都成日帶住幾個主持落區變魔術，不過就畀何雁詩（右一），着得性感搶晒鏡。

Louis喺旺角行人專用區出現，今次唔係《終極街頭魔法王》，但一樣吸引咗好多人圍觀。

有「港版大衛高柏飛」之稱嘅Louis，真係好似super star一樣，勁多人圍住佢等合照。

初初，Louis畀人「集郵」，仲係無任歡迎，他他條條慢慢逐個影。

有指，Louis已經有一個拍拖多年的女朋友Elffi，佢同時亦係Louis嘅經理人。