無綫為慶祝五十周年台慶，播出九十分鐘的台慶特備節目《綜藝精彩50年我愛EYT》，當晚星光熠熠，歷代《歡樂今宵》（EYT）的藝人紛紛獲邀出席，既有闊別視圈三十多年、遠道由澳洲返港亮相的杜平，連自稱不再返無綫的盧海鵬，亦畀面現身做趣劇；可是，卻未見昔日台柱之一的「金牌司儀」何守信（何B）。
有傳，何B今次沒有出現《我愛EYT》，全因汪明荃對當年與何B的一段情仍耿耿於懷，為免令她不快及尷尬，所以有高層將何B踢出局。日前，何B接受本刊獨家訪問，親自解開「被失蹤」之謎。
何B被指因舊愛汪明荃而未被邀請出席《我愛EYT》，他就希望大家不要想當然，又表示即使有汪明荃的地方，自己出現也是沒有問題的。
上世紀恩怨無綫於早前播出《綜藝精彩50年我愛EYT》，當晚節目就邀請了已離巢的杜平、林建明、盧海鵬、廖偉雄、森森、斑斑等，一大班舊時《歡樂今宵》的猛將再現螢幕，更將經典的環節〈蝦仔嗲哋〉、〈扮嘢金曲〉、〈數白欖〉、〈幸運星〉一一重現，勾起觀眾無限回憶，不過昔日的「金牌司儀」何守信（何B）卻未見蹤影。據幕後人員爆料，當初的邀請名單的確囊括歷代曾參與EYT的藝人，不分輩份與知名度，而何B亦是頭號被邀的人物，但有高層想像力豐富，認為當晚主持大局的汪明荃，仍為過去與何B的一段情而小器，遂將他剔除。
上世紀七十年代，何B與汪明荃原本各自有一段美滿的婚姻，可是有傳二人因工作而日久生情，隨後各自先後與原配離婚，而這段地下情苦戀一直是當年娛圈的焦點。不過，男方桃花運超強，不時傳出緋聞令女方難以接受，經常吵大鑊。最終，兩人的關係一直拖拉至何B移民加拿大而告吹，盛傳汪明荃因此事而嬲爆何B。
日前，本刊找到何B親解「被失蹤」的原因。至於癥結所在，是否與舊愛汪明荃仍嬲爆他有關？他笑笑口地說：「呢啲傳聞大家都係想當然，我有乜所謂啫，有冇汪明荃喺度嘅環境，我再出現冇問題o架！吓嘛！咁唔通有汪明荃喺度，我就唔出現？」他更自爆其實與汪明荃九年前已無事：「〇八年，曾勵珍叫我返去拍《畢打自己人》；嗰陣時，汪明荃都喺TVB啦，我都有見過佢，有同佢傾過偈o架，咁耐以來嘅事喇！呢啲嘢！」至於是否如傳聞中有人為照顧汪明荃的感受而不邀請他？何B承認《我愛EYT》的搞手曾志偉，抑或統領無綫綜藝節目的余詠珊，都無正式邀請他：「余詠珊有提過，o依家佢手下幾個人，喺亞視都有合作過，我識嘅，亦都有同我提過，但就冇乜邊個正正式式搵我；曾志偉以前見佢嗰時，就成日講笑咁講，返嚟玩吓返嚟做啦，但呢次冇正式聯絡過我，都係透過人同我講吓。其實，我暫時就真係冇乜興趣喇！同埋，我一早預咗時間返鄉下，冇時間出席。」
十一月十一日，無綫舉行台慶獻禮節目《綜藝精彩50年我愛EYT》，邀請了近百名歷代的EYT藝人現身，但卻欠缺當年的台柱何B。
傳聞，有人要顧及汪明荃的感受，才未有邀請何B上節目；而曾志偉就稱今次花了半年時間籌備節目，更貼錢慶功及印T恤，連息影超過三十年的杜平（右一）亦邀得到。
