江嘉敏獲TVB解凍轉型做打女

新一代「宅男女神」江嘉敏，早前憑《親親我好媽》一劇彈出；不過，有傳因工作態度差及接拍了ViuTV的劇集《三一如三》，因而觸怒無綫高層而遭雪藏。
早前，江嘉敏終冧掂高層，獲得解凍之餘，並立即獲安排連續接拍三套新劇：《果欄中的江湖大嫂》、《再親我好媽》及《兄弟》；而在《兄》中，她更一改清純形象，不再演乖乖女，轉做硬橋硬馬的保鑣，不僅要郁手郁腳，又要揸槍，動作戲多多。日前，她便在尖沙咀鬧市喪跑狂奔，一嘗做打女的滋味。

江嘉敏在另一套新劇《果欄中的江湖大嫂》中同樣有打戲，還搞到粉臉上多了幾條血痕。

從模特兒入行到拍劇，江嘉敏在《親親你好媽》中飾演江美儀的女兒，其十七歲的可愛學生妹look，獲得網民激讚。

連環喪跑現年廿三歲的江嘉敏，自獲無綫高層解凍後，便劇接劇；剛去完英國為新劇《兄弟》拍攝外景的她，日前已隨劇組在尖沙咀海港城外開工。
當日下午，在劇中同是飾演保鑣的江嘉敏、陳志健和陳國峰，身穿黑色套裝配白色裇衫，打扮整齊地現身。劇情講述他們三人正在護駕一個女明星外出行街，但因江嘉敏被爆出是一個富豪的女兒，結果遭到一大群記者追訪，她於是不惜狂奔喪跑撇甩記者。
由於海港城是旅客的熱門購物地，故拍攝時引得不少旅客駐足圍觀，塞滿成條行人路。江嘉敏既要從擠迫的人群中衝出來，又要配合鏡頭所需，結果她要連環喪跑約五、六次，導演才收貨。幸好，她始終是後生女，未見喘氣，但就熱到要除外套，更要工作人員替她印乾臉上的汗水，以及執靚番個髮型和補妝，才可再拍攝。

形象乖乖女的江嘉敏，近來一反常態扮演好打得的保鑣；並在日前於尖沙咀海港城外，連環來回狂奔五、六次，跑到身水身汗。

有新一代「清純女神」之稱嘅江嘉敏（Kaman），入行六年至今，拍過唔少港台節目同電影，去年佢簽咗畀無綫，後嚟仲憑《親親我好媽》純情學生妹一角彈起。近日，佢又接拍新劇《兄弟》，而角色竟然係做王浩信嘅保鑣，一改清純形象。

日前，東姑去咗英國倫敦度假，咁啱就撞到江嘉敏同成班《兄弟》嘅演員。原來，佢哋去嗰邊拍外景，沿路楊明仲請大家「食好西」，搞到成班後生演員鬼咁開心。事後，Kaman透露：「今次我去英國係拍同王浩信一啲重要嘅感情戲，嗰日咁啱大家有假，於是一齊去歎美食，仲去咗倫敦塔橋觀光，又喺上面唱〈London Bridge〉，哈哈！」

日前，江嘉敏、楊明、陳庭欣同劉穎鏇去咗英國拍《兄弟》外景，期間有假期，成班人於是就出去玩，楊明仲請班索女食嘢。

美食旅程中，陳庭欣（左）推介佢哋試呢款青口，Kaman（中）試完大讚夠鮮味。

Kaman喺當地美食市集，發現到呢塊有人面咁大嘅曲奇，佢仲話有分黑同白兩款朱古力味。

之後，佢哋又品嚐咗新鮮生蠔，Kaman（右）就揀咗英國蠔嚟試，食後佢就點評入口味道淡咗啲喎，成個食家咁款。