高性能小房車/揭背車市場近年再次成為歐洲車嘅激烈戰場！
「乜唔係以前已經鬥得好犀利咩？」係，不過以前嘅所謂「高性能」，馬力不外乎接近200匹，配上簡單手波及前驅佈局，以輕快、敏捷定優劣。
今時今日唔同嘞，新車馬力動輒超過350匹、快到癲嘅雙離合器波箱，四驅更係指定動作！
Audi RS 3同M-AMG A45掀起戰幔，去年初facelift版A45以381匹馬力擊敗RS 3嘅367匹馬力，威風一時。
今日終輪到RS 3 facelift了，唔再糾纏喺「300幾匹」嘅領域，一下子跳升至400匹大關！用行動話畀對手知：「沒有最強，只有更強！」
RS 3身份比較特別，佢既係A3車系中嘅頂級型號，亦係RS系列中嘅入門車，所以唔好當佢一般A3咁弱雞，亦唔可以預期佢有RS 6咁嘅癲狂表現。不過，有一點可以肯定，就係RS 3今年首次參加全球大熱嘅TCR賽事即有好成績，將會成為Audi近年喺賽車場上最紅嘅超新星。
改頭換面
對上一次試RS 3已經係兩年前嘅事，當時車廠安排Sportback版本測試，完全切合hot hatch主題。今次facelift仲試Sportback？車廠實在細心，特別用四門房車版作測試車，一來同上次唔同，二來同TCR參賽車同一車型，有助推廣。
不論房車還是揭背車，RS 3嘅車頭都有一定改動。首先，當然係改用A3車系嘅facelift「倒勾」頭燈，內裡組合都改咗；泵把重新設計，喺兩側加咗入風口；而最型係鬼面罩框、新設計頭唇同兩側入風口，都用咗磨沙銀色，成個車頭高級晒！此外，曾出現喺facelift前RS 3同RS 6鬼面罩嘅巨型「quattro」字章，嚟到facelift版RS 3仍然保留，不過縮細咗兼改放喺鬼面罩框底。車身方面，一如以往前、後輪沙板都比一般A3凸出，以容納增闊分別20mm及14mm嘅前、後輪距。由於房車版設有尾廂，所以車身比揭背RS 3長咗136mm，達到4,479mm，而尾燈形狀亦較修長，改用新燈組及設有走馬燈式指揮燈。雖然車款同TRC戰車一樣，但就冇咁誇嘅包圍組件，尾翼只係一小片款式，非常低調，車底嘅導風板同尾喉形狀都冇變過，只同車頭呼應，用咗磨沙銀色框。
車頭嘅「quattro」字章轉咗款，而且下移至鬼面罩框底部。
前輪距增闊20mm，連帶前輪沙板都向外拋出，更具肌肉感！
車尾底部嘅尾喉及導風板其實冇改過，只係加上磨沙銀色框。
房車版尾廂邊緣位置加上一小片尾翼。有得更好
進入RS 3嘅車廂，一對用線繡上鑽石形狀嘅桶形前座非常搶眼，而且留心啲睇會見到前、後座位上，每個鑽石方塊內都打上有色方孔，幾別緻。測試車嘅座位賣相係就係幾靚，不過就冇晒電動調校，只得電動腰部承托力調校。此外，測試車嘅車廂設備實在幾齋，好多廠方講明嘅重要升級設備都冇裝上，買家想知點樣？唯有上網睇嘞，筆者都只係睇過圖片，試都冇得試。眾多新設備中，最可惜係連廠方表明facelift A3車系最重要嘅升級項目－12.3吋Audi Virtual Cockpit全數碼化表板都冇裝上供拍攝，而RS 3係有專用版面嘅，可顯示更多引擎出力資訊及G-force等，測試車都冇裝，真係留待買家新車到手先知點樣玩嘞。RS 3其實仲可以選裝14個喇叭嘅B& O音響、MMI navigation plus及MMI觸控系統，但呢部測試車仍然係冇裝嘅，啱晒對電子系統有恐懼症嘅用家。
車廂整體同普通A3九成九似樣，唔算有好強跑車氣氛。
首飾櫃上有quattro金屬章及新增嘅銀色立體魚鱗紋飾條。
Facelift版RS 3嘅車廂重點改良本在於表板，可惜車廠安排嘅試車只用舊款！費解！
RS 3嘅12.3吋Audi Virtual Cockpit表板其實有專用版面，可顯示更多引擎資訊。
後座只用上前座一樣嘅真皮，並未採用更具承托力嘅設計。
前座由用料以至形狀設計都一等一好，如加埋電動調校就更好。
專用平底賽車軚環，而且加上防跣手物料，靚仔！
房車版尾廂比揭背版大少許，亦可以摺低後座貫通空間。
天窗面積唔算大，但對車廂空間有正面影響。狂增33匹
馬力比賽無止境，facelift前嘅RS 3已經有367匹馬力，但當採用2.0公升直四turbo引擎嘅對手已趕過頭時，Audi廠方又點會放棄RS 3嘅天生優勢？就係採用已連續八年獲得「國際引擎大獎」嘅2.5公升直五turbo引擎！多對手約500c.c.及一個汽缸，升級更輕鬆，呢啲就係贏在起跑線！引擎更換更輕量化曲軸，比上代輕咗26kg，配合重新編寫電腦程式，輕易為引擎增加33匹馬力，達到400匹馬力關口，0-100km/h可以4.1秒完成，同級中完全冇對手！威盡！
此外，新車亦增加咗Wheel-selective torque control車輪選定扭力控制，可以配合quattro四驅，喺急彎情況下，系統可以為負荷較少嘅內彎車輪施以少少迫力，令外彎車輪得到更多扭力，急彎動態都可以變得流暢。實際試車發覺facelift後嘅RS 3雖然係有400匹馬力，但印象中加速力同之前分別唔大，筆者反而覺得排氣聲冇以前咁爆！最大聲嘅爆響只出現喺著車一剎，之後反覆試車，都發覺加速時排氣聲仍然夠晒吸引，但拖波時嘅backfire聲就明顯少咗，斯文咗啲喎。
行車模式分成舒適、自動、動力及個性化四種，其中個性化模式可供用家自訂多種設定。
2.5公升直五turbo引擎有更大升級空間，所以馬力增至400匹都唔係難事。
RS 3嘅軚盤轉波撥片比一般A3大塊，操作更就手。
仍用7速S-tronic波箱，轉波反應一如以往地又快又順。
Audi RS 3 Sedan Spec.
引擎：2,480c.c.直五turbo
馬力：400hp/5,850-7,000rpm
扭力：49.0kgm/1,700-5,850rpm
傳動：7前速自動、附+/-模式
車身：4,479×1,802×1,399（mm）
軸距：2,631mm
車重：1,585kg
耗油：8.4-8.3L/100km
0-100km/h：4.1秒
車價：$791,800起
查詢：Audi HK（3465 0000）
宿敵 M-AMG CLA45
車價：$825,000
RS 3分成Sportback同Sedan，食晒兩個車款用家，佢嘅對手A45又點會輸蝕？M-AMG亦有將A45整套動力系統搬去房車CLA45！馬力當然一樣有381匹，只比RS 3少19匹，扭力都有成48.5kgm，絕對唔係流嘢！CLA45嘅0-100km/h只需4.2秒就可以完成，數字上慢RS 3 0.1秒，跟本難以分辨。
撰文：袁國基
攝影：陳浩然
Audi RS 3 Sedan
