戚美珍笑言靚過其他女嘉賓，所以冇機會上台唱歌。
賈思樂（Louie）前晚喺尖沙嘴舉行慶祝入行40週年音樂會，王馨平、黎瑞恩、羅敏莊、戚美珍（三嫂）做嘉賓。三嫂接受訪問時講笑話，可能Louie怕佢靚過曬其他女嘉賓，所以冇搵佢上台唱歌，只係負責上台爆Louie往事。三嫂仲話原本去年有個導演朋友搵佢開騷，不過因為有病推咗，佢話：「患咗椎間盤突出，醫咗好耐，企一、兩分鐘一定要坐，用咗枴杖好耐，𠵱家情況好咗，仲有做物理治療。」所以劉德華受傷，三嫂感同身受，佢話：「真係不敢想像，我椎間盤突出拮到神經線都麻痺，唔會行唔到，佢畀隻馬壓親，真係好痛。劉生韌力過人，希望佢快啲好番。」
黎瑞恩就趁暑假同一對仔女去旅行，佢話：「去邊佢哋話事，有一樣嘢好開心，家姐聽到我同泳兒首合唱歌，佢冇試過話我嘅歌好聽，今次打嚟話好聽，仲抄埋歌詞，我覺得幾好，對佢中文有幫助，不過佢係寫簡體字。首歌係講媽咪同個女，我自己聽都喊咗幾次。」
賈思樂前晚開個唱，請咗唔少好友做嘉賓。
王馨平希望今年成功開演唱會，到時會表演彈結他。
王馨平傾個唱
而王馨平唱歌外仲表演結他伴奏，佢話平時都有彈畀老公聽，老公都識彈，試過一齊彈結他。佢仲話最近傾緊開演唱會，希望今年成事：「到時要彈結他，啲衫要勁過上次（早前穿勁低胸上節目），上次小意思箒。」
撰文：馮仁昭
劉德華雖然要養傷，但佢都有送花籃賀賈思樂開騷。
劉德華。資料圖片
From:
http://hk.apple.nextmedia ... 170607/20046657
