14年喺《Sunday扮嘢王》因模仿cool魔張智霖而多咗人認識嘅張振朗，無綫力捧小生，最初係因為貌似黃宗澤，故有「翻版黃宗澤」之稱，參加過英皇新秀讀埋大台藝訓班，扮完Cool魔再獲曾勵珍讚賞後，拍《愛·回家》Season2，開始儲人氣，加上無綫走下一個，走下又一個，依家成為力捧小生！
今次張振朗喺《踩過界》嘅演出，反應相當唔錯！其實喺呢套劇啱啱播映嘅時候，張振朗同王浩信呢段喺同一屋簷下生活頗有HeHe feel，真係能成密友總帶著愛！
《踩過界》昨晚播到第10集，講完楊證樺沈可欣與星仔嘅故事之後，輪到陳庭欣飾演嘅跨性別人士單元。故事講述準備接受變性手術嘅幼稚園老師陳庭欣，相約谷一夏張振朗去打網球，喺更衣室俾學生媽咪發現佢原來係男扮女裝，於是報警告陳庭欣非禮。
本來癲姐蔡思貝同張振朗諗住游說學生媽咪，希望可以和解呢件事，點知因為飾演佢老公嘅陳志健原來係雙性戀，所以學生媽咪好抗拒，堅持要告到底。
另一邊廂，張振朗喺fb發現陳庭欣仲喺「男兒身」嗰陣，有一個拍咗拖兩年嘅女朋友陳婉婷(角色名叫Hilary)，於是諗住聯絡對方、希望游說佢出庭幫陳庭欣。
但係陳婉婷同陳庭欣分咗手之後，一直都好唔諒解呢個人，加上佢又即將同富家公子結婚，所以拒絕咗張振朗。不過張振朗希望為咗陳庭欣，揸住電單車追截陳婉婷，諗住繼續游說佢，點知途中發生交通意外，成架車剷落地，壓住張振朗隻腳，只見張振朗隻右腳扭到變成不可能的「L」形，後期加工咗啲血色喺膝頭同腳踝位置。
意料之外嘅係，鏡頭一轉，急症室裡的張振朗，右腳下肢被截，但原來唔係因為今次意外所致，而係因為當年因為一宗爆炸案，幕後黑手直指豹哥單立文。
《踩過界》嘅CG，當然好過《賭城群英會》好多(如果你有睇陳百祥、陳法蓉死嗰兩集，發夢都會笑醒)《踩過界》畫面見到張振朗截肢，以及除咗義肢搽藥膏嘅片段。
前日張振朗接受傳媒訪問，他稱：「其實我又冇專登去學點樣行路，因為我本身都唔想俾人知呢件事，所以好堅持要做到自己好似正常人一樣，反而我係走去學揸電單，不過嗰陣未考到牌，所以電單車嘅戲份要喺拖架度拍，好記得有一次我同浩信坐喺架電單車度，點知一轉彎，我哋兩個差啲瞓低咗，原來喺拖架度拍電單車戲，都要有技巧，嗰次真係一個好好嘅經驗，亦都好彩冇意外發生！」
至於劇情發展，張振朗話：「其實我同豹哥(單立文)本身有結怨，佢主使咗一個人令我冇咗隻腳，而嗰個人係我一個好相信嘅人，不過我唔會講係邊個，要賣個關子，俾大家估下！」佢仲話：「我自己都好期待，因為我哋成個團隊真係用咗百分之二百嘅努力去做，我都覺得係時候做返自己，洗走張智霖嘅影子！」
from:
http://hk.apple.nextmedia ... 170723/20098914
