何超盈俾《福布斯》視為新生代大亨，日前獲邀去新加坡出席論壇。
賭王四房大女何超盈搞藝術拍賣同文化創意有聲有色，連美國哈佛大學都邀請佢去演講，前日就被《福布斯》邀請去咗新加坡出席一個以「Next Tycoon」為題目嘅論壇做講者。大會就嚴選咗20個嚟自亞洲，唔同界別被視為新世代有潛力升為大亨嘅人嚟分享，超盈同霍啟山就成為香港、澳門代表。
問到超盈被《福布斯》喻為新一代大亨嘅感受，佢話：「開心被人認同，努力緊，都唔敢偷懶，自己梗係冇諗到咁遠，佢哋畀咗個目標我，會向呢個目標進發。」超盈講到今次經驗同上次喺哈佛好唔同：「上次，係準備咗想同人分享嘅嘢講，今次係一個closed panel，喺一個《Forbes woman》嘅執行副主席做主持人，佢即場隨意問我哋嘅問題，都幾尖銳。當中佢有問到我屋企背景有幫到我哋喺商界人脈發展，亦同時會被人質疑呢類問題。」
何猷啟（中）噚日喺將軍澳出席東華活動，匆匆完成儀式，未有接受訪問。
猷啟閃現東華
另外，賭王三房兒子何猷啟、邵仲衡及Super Girls就喺將軍澳出席東華活動，猷啟無做訪問就閃走，邵仲衡承認《詭探》會開第二季，而Super Girls成員Cheronna認同夏雨囝囝黃俊銘拍拖一個禮拜：「佢係一個好有禮貌男仔，佢追咗我三個月，係正常約會、行山打羽毛球，有一日佢問我可唔可以做佢女朋友，覺得佢好勇敢。」
撰文：馮仁昭
from:
http://hk.apple.nextmedia ... 170713/20087350
