提起許冠文，一定會諗得起佢嗰四兄弟「文武英傑」，四兄弟均於演藝圈工作，二弟許冠武最低調，而三弟許冠英同四弟許冠傑（Sam）喺演藝圈各放異彩，惟許冠英於2011年不幸離世，終年65歲，令人大感惋惜。
現年74歲嘅許冠文，演而優則導，亦曾擔任電影編劇及監製，有「冷面笑匠」外號。於1968年、仍在求學嘅許冠文加入無綫，創作並主持校際常識問答比賽，其後獲安排加入《歡樂今宵》，創作咗《新聞趣事》等時事環節，到佢大學畢業後一度離開娛樂圈，後來重返無綫，與阿Sam演出《雙星報喜》，大獲好評。其後佢主力喺電影圈發展，亦多次孖住細佬一齊演出，包括《半斤八両》、《天才與白痴》、《摩登保鑣》等。舊年許冠文憑《一路順風》入圍台灣第53屆金馬獎影帝，惜大熱倒灶；而佢喺2011年曾獲意大利烏甸尼斯電影節頒發終身成就獎，表揚其演藝成就。
二弟許冠武係許氏四兄弟中最低調嘅一個，其實佢係電影攝影師，亦曾執導演筒，而喺《半斤八両》及《新半斤八両》等電影中，許冠武參與幕後策劃及有客串。佢亦有協助哥哥許冠文嘅棟篤笑表演，亦又試過喺細佬Sam嘅演唱會中亮相。
許氏兄弟嘅「老三」許冠英於1970年代加入邵氏演員培訓班，3年後參演許冠文及許冠傑主演嘅《鬼馬雙星》，備受注目，其後參演過多套電影，包括《半斤八両》、《發錢寒》、《殭屍先生》等，大部份都係笑片，亦成為佢「鬼馬笑星」奠下根基。雖然許冠英喜劇感逼人，歌藝亦不錯，曾舉行過演唱會，但際遇問題令其成就一直未能超越其兄弟。許冠英於2011年11月被發現倒斃家中，死於心臟病。
至於有「歌神」之稱嘅Sam，於1960年代數度同朋友組成樂隊，更曾喺夜總會及酒店等地方演唱，後來Sam作獨立發展，佢擅長以廣東話唱出社會現況，諷刺時弊，另有唔少講述打工仔心聲嘅經典作，佢喺1970年代，推出過多首至今仍大受歡迎嘅經典作品，包括《鐵塔凌雲》、《浪子心聲》、《梨渦淺笑》同《打雀英雄傳》等。雖然Sam喺1992年引退，但佢喺2004起逐步復出，主力係勉勵港人，亦有舉辦演唱會，下月就聯同譚詠麟假紅館舉行「阿Sam阿Tam Happy Together演唱會2017」。
其實「文武英傑」出名嘅點止呢啲，曾經電影都攞佢哋四兄弟個名嚟做角色名，嗰套就係1990年《開心鬼開心鬼》，主角係Beyond四子，分別飾演文、武、英、傑，劇情安排佢哋追李麗珍、陳加玲、羅美薇同袁潔瑩，而佢哋更為咗追女，唱咗隻《文武英傑宣言》o添！
from:
http://hk.apple.nextmedia ... 170717/20092456
