有「亞洲神童」之稱嘅張如城，當年首本名曲《中國的巨龍》唱到街知巷聞，咁多年嚟佢對娛樂圈熱情不減。闊別5年，早前佢為咗自己創作嘅網劇《狂飊小鎮》寫主題曲《紅日之火》，「亞洲神童」MV嘅曲風、舞步、以至颱風依然故我，《紅》喺網上嘅點擊率仲氣勢如虹，喺騰訊點擊有15億！
張如城創作網劇，仲寫咗首主題曲《紅日之火》。互聯網圖片
「我有好多嘢做」
噚日張如城喺尖沙嘴搞咗個慶功，佢本人遲到半個鐘抵達，但慶功仲係唔可以開始，因為張如城要化妝，慶功比預定時間遲咗一個鐘。穿上火紅色西裝嘅張如城，大咗一個碼，佢嘅老師曾航生同大會即場頒咗「最喜愛歌手獎」畀佢，現場媒體多次邀請張如城即場獻唱，最後佢只係清唱兩句。
張如城被問到《紅》喺騰訊有15億點擊，會唔會乘勢開演唱會？佢話：「會呀，有人想贊助我今年開，但未入紙。有贊助而係場地問題，我有好多嘢做，內地工作要做埋先。」到時會唱乜歌呢？佢話：「都係唱正能量嘅歌，我自己本身都寫咗百幾首歌。」
撰文：馮仁昭
from:
http://hk.apple.nextmedia ... 160921/19776534
