章子怡收取2億酬勞，破例拍攝古裝劇《帝王業》。資料圖片
呢兩年中港台三地演員喺內地拍劇好好搵，身價屢創新高，拍一齣劇攞一億人民幣酬金已經唔係天方夜譚，好似章子怡最近都接咗古裝大劇《帝王業》，酬金高達2億，再創內地演員拍劇身價，而男主角係𠵱家內地人氣最勁嘅胡歌，佢酬金都有1.5億。
章子怡今年8月拍完荷李活片《God Particle》，話好開心識到一班朋友。微博圖片
爭網絡版權
聽講內地唔少網站都爭緊買《帝王業》呢齣劇嘅獨家網絡版權，騰訊同愛奇藝爭得好激烈。周迅同霍建華合演嘅《如懿傳》，騰訊以8.1億買咗獨家網絡版權，可以估計《帝王業》由章子怡同胡歌合演，版權費肯定超過10億。好多年前張藝謀曾經話過：「章子怡、鞏俐絕不接演電視劇。」佢同章子怡雖然有此約定，但隔咗咁耐，又有一個咁吸引酬金，好難唔心動，聽聞今次章子怡都係呢齣劇嘅投資人，佢會攞部份酬金用嚟投資。
《帝王業》明年中開拍，原著係內地網絡小說，好受歡迎。章子怡演出身自貴族嘅王儇，而胡歌就演寒族武士蕭綦，故事講述王儇被迫同青梅竹馬男友分開，下嫁蕭綦，婚後佢仲要同老公一齊打天下。
撰文：馮仁昭
from:
http://hk.apple.nextmedia ... 161219/19869659
