楊洛婷樓梯試甫博生B

楊洛婷與模特兒鍾浠文（Zelia）昨日在金鐘出席時裝活動，楊洛婷透露年尾會和Dear Jane主音老公黃天翱（Tim）努力造人，她說：「老公下月開演唱會，想搞佢都搞唔到。好多人畀資料我哋，介紹排卵棒同用乜姿勢，我哋喺屋企條樓梯試擺嗰啲姿勢，應該會high啲。」

Zelia現時半停工照顧病父，她說：「上月爸爸喺內地入咗院，係肺嘅病，好嚴重，冇得醫，因為佢同媽咪分開咗，我接咗佢過嚟香港。佢話想坐郵輪，我計劃緊呢個月尾或下月頭抽五日陪佢去。」問醫生有否提到爸爸還有多少時間？她眼濕濕說：「醫生好保守，我唔想講幾耐，好難受。」

採訪、攝影：羅慧敏
from:http://hk.apple.nextmedia ... 160826/19749431

楊洛婷

樂隊Dear Jane前晚喺九展舉行一連兩場演唱會，吳業坤同自封Dear John新組合嘅衛蘭、衛詩、連詩雅、新人曾若華（Jude）做嘉賓，捧場睇騷就有Super Girls、袁澧林等。Dear Jane主音阿Tim個老婆楊洛婷絕對係癡心fans，除咗高舉示愛牌之外，中場仲走埋台邊送花獻肉嘴，當然呢啲只有阿Tim獨享。完騷後兩公婆又肉緊抱抱，肉麻到呢……

老公阿Tim台上耍冧招，楊洛婷high到走去台邊送花兼錫錫。

Dear Jane前晚喺九展舉行一連兩場演唱會。

扮城城𠱁老婆

阿Tim唱老婆嘅男神郭富城首《狂野之城》時，仲扮埋城城跳舞，耍冧招高呼：「老婆，I love you！」晒恩愛。坤哥着住皮背心扮到好rock咁出場，戴住一邊有假紋身嘅手袖，但就俾Dear Jane笑係1984年造型兼玩踢爆話：「坤哥要求啲衫要自己襯過，可以揀得靚啲，估唔到襯到咁。」

完騷之後，阿Tim講到𠱁到老婆勁開心：「係咁易啦！我睇咗城城嘅演唱會，偷少少師用嚟表演。」佢又笑坤哥個造型遲咗30年：「坤哥好好笑，着之前影咗相畀我哋睇，估唔到咁好笑，現場見到佢上台個吓，都差的甩bit。」另外，衛蘭、衛詩姊妹同Jude話佢哋以後會用呢個形式繼續唱。

撰文：馮仁昭
from:http://hk.apple.nextmedia ... 160905/19760028