五十五歲嘅杜德偉（Alex）畀人話似係食咗防腐劑一樣，咁嘅年紀保養得宜，身形更加唔使講，一直fit到漏油，舞台上一邊唱「脫掉、脫掉」，一邊剝衫，好多女粉為佢瘋狂尖叫。就算Alex去年榮升爹哋，「男神」做「湊仔公」都湊得型過人。
早前，東姑就喺天后一間café，見到Alex同埋老婆Ice、囝囝AJ，一家三口溫馨開餐。Alex對細佢二十四年嘅嫩妻Ice，仲照顧得無微不至。席間，老婆抱埋囝囝入廁所，唔知係去餵人奶定換片，雖然只係幾步路，但係Alex都唔放心，貼身護送妻兒入埋廁所。後來，老婆抱仔返埋枱坐，Alex又即刻接手湊囝囝，等老婆慢慢食嘢，真係好體貼。
東姑見AJ戴住頂cap帽仔，面圓圓、肥嘟嘟鬼咁可愛，仲同Alex十足「餅印」咁一樣「型仔」，難怪爹哋抱住佢愛不釋手，猛逗囝囝玩，又猛錫囝囝個「面珠登」，一副有仔萬事足嘅樣。
Alex貼身護送老婆同囝囝入廁所，唔知係餵人奶定換片，入咗廁所十幾分鐘先出嚟。
一家三口溫馨開餐，Alex對老婆仲好體貼，返埋枱即刻由佢接手湊仔。
AJ同爹哋一樣戴住cap帽，面圓圓、肥嘟嘟好可愛，同Alex都幾似樣。
五十五歲嘅Alex凍齡冇老過，就算做「湊仔公」都湊得型過人。
