日本新片《貞子vs伽椰子》前日喺日本開畫，片中主角之一嘅貞子近期頻頻現身，為爭取曝光率竟然連宅男市場都唔放過，仲學偶像拍攝一輯充滿少女味嘅清純寫真，為谷票房一於有殺錯冇放過。
《貞子vs伽椰子》集合《咒怨》同《午夜凶鈴》三大邪靈上演鬼打鬼情節，貞子、伽椰子同俊雄當然要四出造勢，而開畫日撞正「第8屆AKB人氣總選」，貞子同伽椰子都效法AKB玩總選鬥人氣，結果貞子以6萬多票打敗伽椰子成為鬼后，慘成輸家嘅伽椰子，前日冇得出席《貞子vs伽椰子》嘅謝票活動，伽椰子果然牙齒當金使，仲履行承諾，同乖仔俊雄喺澀谷街頭幫手執垃圾，認真母子情深。至於貞子前日下晝以勝利姿勢現身戲院，出場時獲觀眾報以熱烈掌聲，又舉起雙手「萬歲」賀封后，連同片拍檔山本美月、玉城Tina、安藤政信都唔夠佢受歡迎。
from:
http://hk.apple.nextmedia ... 160620/19661876
