衛詩話唔介意同家姐衛蘭同一間公司會俾人比較。
衛詩（Jill）09年2月同當時男友關楚耀喺日本涉嫌藏毒被捕，等候審訊期間喺日本過咗兩個月牢窗生涯，不過當日容顏憔悴嘅Jill，𠵱家除咗運動，再加上健康飲食，成個人都脫胎換骨，佢日前接受訪問時話：「冇過去嘅我，就唔會有𠵱家嘅我。啱啱返嚟香港嗰陣，好徬徨好無助，有日Sammi（鄭秀文）打畀我，話好想送本聖經同埋佢本書畀我，佢家姐嗰時住我屋企樓上，佢就直接上嚟我屋企，話要同我傳福音，仲講咗好多鼓勵我嘅說話。以前嘅我，哈哈，真係睇唔出會返教會，但𠵱家（信仰）對我好重要。」
衛詩（左）話Sammi（中）當年專登送聖經畀佢，讚對方好有心。
衛詩09年喺東京涉毒被捕，被囚兩個月獲判緩刑離開日本。資料圖片
半年前同男友分手
藏毒事件後，Jill同關楚耀各行各路，三年前Jill公開新戀情，但原來兩人半年前已分手，佢話因為拍拖兩年，對方返咗美國，唔喺一齊好難維繫，但喺和平之下分手。
有人話Jill同家姐衛蘭（Janice）做埋同一行，仲要喺一間公司，一定會俾大家比較，Jill就話冇所謂，仲讚家姐新歌好聽。佢仲話以前成日會同Janice鬧交，但𠵱家會坐低傾偈。
撰文：馮仁昭
from:
http://hk.apple.nextmedia ... 160629/19673615
