昨日ViuTV選美節目《美選D.n.A.》第三輪面試，其中一參賽者叫鄧凱旻（Ruby），芳齡22歲，佢報稱三圍係33C、25、35，係2010年末代會考生，亦係香港第一代YouTuber——成名作就係自拍短片、寸爆香港教師英文差嘅「港女Ruby」！
「港女Ruby」成功之處，唔係多人like，而係多人鬧。鬧佢嘅網民都係話，Ruby根本冇資格批評人哋英文差。網民dislike嘅package當然包埋起底，由讀邊間學校住邊度甚至參加過乜嘢比賽都如數家珍列晒出嚟。
眨下眼又六年。昨日嘅Ruby去ViuTV面試《美選D.n.A.》，自我介紹係YouTuber，外號Ruby Close，佢仲話自己幾乎係香港第一個YouTuber，亦因為呢個外號而更多人認識自己。
問Ruby以往拍啲乜嘢多，佢話近排較少，以前都係一啲比較生活化嘅嘢，例如佢自己鍾意嘅或見到啲乜都會拍嚟同人分享吓，講飲講食都有啲。現職為freelance model，有時又幫啲online apps，或o依家稱呼為KOL（關鍵意見領袖）拍片居多，喺online media上發佈自己嘅嘢。
記者問Ruby參加選美係咪為咗提高知名度？佢坦承：「一方面啦，另一方面就係自己都鍾意玩嘅，第一屆喎！有新嘢玩梗係想挑戰，因為我係一個比較活躍嘅人嚟，好鍾意挑戰自己，咁一見到有啲新嘢就好鍾意去玩，例如之前有線嗰啲《十萬蚊港女大翻身》，或者TVB《網絡挑機》，我一聽到就即刻去玩，都有拍過。」
今屆Viu嘅佳麗多紋身，問到Ruby有冇，佢話冇，仲話自己冇結婚、冇男友，簡稱「三冇」。
睇番Ruby啲YouTube片，都真係幾生活化，例如佢去旅行，近至長洲，遠至歐洲嘅都有，另有佢俾男友人FatKing嘅化妝片段，亦有Ruby教人3分鐘快速化妝嘅短片有得睇。
不過，有名facebook用戶周棨軒就轉發咗《蘋果》呢段即時新聞，仲自問：「又關我事」，再睇埋樓下啲留言，發現周先生應該就係經常同Ruby一齊拍片嘅FatKing，好多人都暗示FatKing同Ruby係一對，仲有一位叫「張致恒」嘅網民留言話：「去飲都攜眷出席啦。。。」周先生就回覆：「我依家同你一樣處境啦！」再加個喊樣emoji。
from:
http://hk.apple.nextmedia ... 160618/19659643
