陳潔儀日前接受本報專訪，她說會在香港站演唱會加入廣東歌答謝歌迷。攝影：沈健程
新加坡歌手陳潔儀（Kit）有一口流利英語，普通話也說得比廣東話好，然而，Kit卻很喜歡唱廣東歌，能讓她找回童年的親切感。現在連「嘅」、「啦」、「咁」的廣東字都認得，她為此感到很驕傲，有外國朋友聽過她唱廣東歌，都讚她特別有感情，Kit說：「我覺得自己同呢種語言有一種默契。」
撰文：余燕儀
出名唱得的新加坡過江龍陳潔儀，將於月中假會展舉行「着迷．陳潔儀」巡唱，香港站會多唱廣東歌，她日前接受本報記者專訪說：「我好多國語歌有廣東版本，自己4年冇喺香港開騷，所以好興奮，但唔會好大壓力，以前好似賣身畀唱片公司，好多嘢好似逼住去做，呢種係無形壓力，但𠵱家就算辛苦，都係心甘情願付出。」
有童年感覺
7月推出的新碟，Kit亦打算收錄廣東歌，但只得一首：「我非常注重香港歌迷，點都要一首廣東歌，覺得係一種溝通方式，自己一直好鍾意廣東歌，覺得好好聽。」Kit的廣東話不算太流利，她坦言：「其實我母語係英文，國語都係好過廣東話，但我由97年劇本好多廣東話字都睇唔明，到𠵱家已經好驕傲，連『嘅』、『啦』、『咁』都識睇。新加坡裏面廣東人係少數，但我細個同阿爺阿嫲講廣東話，我嚟香港發展接咗《雪狼湖》，當時我嘅廣東話真係唔好，之後接住拍劇集《妙手仁心II》畀我好大幫助，嗰種感覺我唔識講，係一個感情嚟，每次嚟香港聽到廣東話，用廣東話同人溝通，好似返到童年感覺好親切。有外國朋友話我唱廣東歌特別有feel，雖然佢哋唔識聽，所以我覺得同呢種語言有一種默契。」
Kit特別喜歡廣東話，唱的歌也特別好聽。
原來今次是Kit首次香港個唱，之前都與其他歌手合作。
拍劇集《妙手仁心II》，令Kit（右）的廣東話更進步。劇照
不欲生小孩
Kit於4年前跟拍拖13年的新加坡金融機構主管男友結婚，問到老公是否每站騷都捧場？Kit說：「唔一定嘅，因為我做嘢係六親不認，父母同老公會揀重要演出先出現。」是否跟老公協議不生小孩？她說：「我唔係好鍾意細路仔，做媽咪唔係我天職，老公都好似唔鍾意小朋友，除非可以即刻大啦。」
場地：Renaissance harbour view hotel HongKong
from:
http://hk.apple.nextmedia ... 160603/19638664
