作為電視迷，有選擇絕對是好事，不想來來去去都是幾個「親生仔女」，新電視台ViuTV就為觀眾帶來一批新面孔。最近有位「文青女神」在網上彈出——替ViuTV拍開台宣傳片的女主角袁澧林，高䠷身材加清純笑容，網民大讚她好「gfable」（非常適合做女朋友），可惜女神宣佈名花有主！不過「gfable」選擇仍是有的，黃心美、楊偲泳和陳俞希各具特質，相信每個人身邊都會有一位「女神」在左右。
撰文：嵐山
袁澧林（Angela）
年齡：22歲
身高：170cm
體重：52kg
ViuTV節目：ViuTV開台宣傳片、《三一如三》（未播）
身高有170cm的袁澧林（Angela）年紀輕輕只有22歲，與陳瀅和王宗堯前度女友黎紀君屬同一間模特兒公司，去年拍美心賀年廣告而有「美心少女」稱號。上月ViuTV開台，大膽起用零拍劇經驗的Angela擔正做宣傳片女主角，清新面孔瞬間被網民起底，令Angela的facebook在一夜間急增逾萬「朋友」。Angela日前在銅鑼灣受訪直言受寵若驚，她說：「條宣傳片每日起碼播5、6次，好多人留言話日日睇，自己都超級驚喜。」
接受毒男惡習
怎樣看「文青女神」這個封號？Angela說：「啲人覺得我文青，可能因為我著衫好簡潔或者好有書卷味；而我見過自己覺得最文青嘅人，其實係一個爛佬咁，但佢睇好多書，識寫詩、識音樂，寫影評。我係咪女神？呢個問題真係難答，王菲、姬拉麗莉（Keira Knightley）同愛瑪屈臣（Emma Watson）都係我女神，我覺得我一定未去到嗰個level喇！」
Angela謙虛說自己未達女神級數，但好多男粉絲都讚她好「gfable」，Angela好奇地問：「Gfable係咪一定要順人意、嬌滴滴好聽話咁樣？我個人其實好男仔頭，唔一定要著到好靚先出街，手袋要人哋幫我拎，我就唔係嗰啲人。」Angela揀男友首要條件是夠成熟，打機、打波甚至「毒男」這類港女嫌棄的惡習，她都接受，Angela說：「我唔會特別畀一個靚仔吸引住，就算『高登仔』都可以有唔同性格，我由細到大都知道上高登啲人係好叻嘅，呢個真嘅。」問到現在有沒有男朋友？Angela一臉羞怯地謂：「呀……有嘅，哈哈，但又唔係拍咗好耐。」她自覺是一個獨立女性，但間中都會嗲男友，她說：「覺得好安全或受保護時，自然就會好開心。」
謙稱未達女神級數的Angela，率直大膽、立場堅定，甚有偶像愛瑪影子。
Angela曾參與ViuTV宣傳片，憑氣質就吸引逾萬名追隨者。電視圖片
六四七一解說
別看Angela外表斯斯文文，其實膽子好大，上年暑期曾經一個人揹住背囊去埃及個半月做交流生，當時還遇上不愉快經歷，她說：「其實去之前都好驚，因為好多地方發生爆炸。加上係旅遊淡季，當地人啱啱完咗齋戒期，一個黃皮膚喺街上好危險。我試過行街突然成班人衝埋嚟同我合照，有啲人搭膊頭或尷尬部位（背部胸邊位置）。」Angela還計划去印度旅行，問到父母有沒有阻止？她笑說：「佢哋阻止唔到我。」
Angela是個不愛束縛的人，六四集會、七一遊行、反新界東北發展遊行都曾經參與，她解釋：「每個人去都有唔同原因，近年啲人希望將六四集會轉化成新希望，而我係為悼念亡魂，犧牲咗嘅人，自己睇到覺得好痛苦。而參與七一，有啲人好理性，有啲人為咗一個目的，有啲人好emotional，唔滿意現狀都會去，係一個好大型活動，我上年都有參與。」
場地提供：hmv Bar& Restaurant
from:
http://hk.apple.nextmedia ... 160510/19604575
