早前「至索嫲嫲」戴蘊慧（真真）自由行遊杜拜，不料被幾名陌生漢衝上包車，她甚至想過自盡保貞節！昨日仍身在歐洲的真真在電話說：「我係第一次去杜拜，book咗五星級酒店，第二日由酒店安排我去沙漠行程，而我book嘅係private tour，司機係一個貌似拉登嘅當地人，自己絕對唔係種族歧視，佢邀請我坐司機隔籬座位，我都隨佢意，以示友好。」
包車司機忽然改行程不去沙漠，帶戴蘊慧去住宅區，令她生疑。
戴蘊慧最終順利到達沙漠景點。
諗過自盡
然而，出發後司機竟用手機肆無忌憚影真真相，真真開始有危機感：「當我以為去緊沙漠，架車突然駛咗去住宅區，佢嘰哩咕嚕話要接埋其他酒店員工，我好驚，同佢拗：『呢架車唔係我book咗咩？』」半粒鐘後，幾個阿拉伯彪形大漢上車，真真說：「我問點解會咁樣，覺得有少少恐怖，司機將音樂聲量校到好大，我越嚟越驚，嗰班人不停喺度笑喺度嘈。」
真真為保安全，用手機跟他們影合照貼facebook：「我同佢哋講facebook有幾百個朋友，fans page有成千幾二千人，特登話畀佢哋知，佢哋嘅樣已經上咗fb，司機第一時間將音樂聲量校細，佢哋嘰哩咕嚕唔知商量乜嘢。之後架車突然掉頭，嗰時我已經作最壞打算，如果佢哋對我不利想侮辱我，我諗住自盡以保名節，當我問佢哋去邊？佢哋話：『你唔係要去沙漠咩，𠵱家咪掉頭去沙漠囉。』咁即係話我將佢哋嘅相貼互聯網係有效。」
真真返酒店之後馬上聯絡旅行社，她說：「一個人去旅行要小心，去旅行最好同熟嘅朋友，仲要係一班人，尤其係去中東地方。」
採訪：皓騫
from:
http://hk.apple.nextmedia ... 160427/19587379
