現年35歲、歌手出身的董敏莉（Monie），早前宣佈本月下嫁拍拖兩年、比她年長15年的律師才俊男友莊耀金，雖然Monie講明婚禮一切從簡，但結婚是一生人一次的大日子，所以準新娘Monie亦希望可以穿上靚靚婚紗影婚紗相。前日Monie到尖沙嘴試婚紗，對婚紗款式的要求，她要求簡約典雅就夠：「Low cut唔係好啱我，我比較鍾意有袖嘅婚紗款式，亦唔需要太多閃石珠片。」
雖然不打算大搞婚禮，但董敏莉和未婚夫近日亦忙於與身邊朋友食飯慶祝。資料圖片
對於婚紗和晚禮服的要求，董敏莉坦言喜歡簡約典雅款式。
十幾人去日本蜜月
Monie坦言結婚是兩口子的事，所以只會做簽紙註冊而不打算擺酒：「其實細個有諗將來自己個婚禮，可以喺外國嘅大草地舉行，不過之前搵過資料，原來喺外國結婚程序都幾繁複，若果喺香港大草地搞，又驚多蚊，所以最後打消呢個念頭。而註冊同擺酒放埋同一日，對我嚟講會幾大壓力，亦都煩到親戚朋友，所以同未婚夫決定每件事分開做，近排我哋都分別約唔同朋友食飯慶祝，遲啲就會同兩邊家人食飯。」
董敏莉表示希望先調理好身體，準備生B。
對於蜜月地點，Monie和未婚夫原打算到英國，但因擔心歐洲政局不穩定，因此決定將地點改為日本：「呢個honeymoon會好熱鬧，因為我哋會同10幾個屋企人一齊去，今次去完，下次就有藉口兩個人再去多次，哈哈！咁就可以成日都去honeymoon。」
至於婚後會否生BB？Monie表示和未婚夫早有共識：「以前覺得小朋友同小動物都唔係我啲friend，但近年漸漸鍾意咗佢哋，我哋有商量過，應該兩年後先生B，因為我本身貧血，中醫話我身體好似一嚿冰咁，所以想趁住呢段時間調理好身體先再諗。」
採訪：王梓嫚
攝影：陳志嵐
場地：香港藏愛婚紗
from:
http://hk.apple.nextmedia ... 160416/19573155
