五月天迷激戰。
「最美的願望 一定最瘋狂」台灣天團五月天每年5月唱爆紅館，香港五迷倔強堅守第十年的「五月之約」，五月天就是他們的神！19歲學生妹小喬為買飛捱麵包、死忠粉絲阿卞帶「抗爭三寶」瞓街一星期、早期擁躉「烏龍茶」珍藏跟五月天的菲林合照，這一次為自己的瘋狂，在風中大聲的唱。
記者：皓騫、倩宜 攝影：馮峰、吉吉、陳順禎
烏龍茶珍藏極多，但最巴閉的一次是跟阿信講過電話。
初代擁躉珍藏晒冷
年齡保密的烏龍茶是初代fans，曾有幸跟阿信傾電話：「當年返學去唔到酒店等，有朋友幫忙打電話畀我，阿信肯聽仲同我講：『考試來不到，不緊要，用心溫書，不要掛着追星。』石頭就最好人，我試過喺機場跑到閘口，石頭見我氣喘就話：『休息一下。』超級非常窩心。」
烏龍茶珍藏的紀念品，包括簽名、初版書、初代螢光棒、T恤，還有跟各成員的合照：「𠵱家搵佢哋合照非常之難，嗰時實在太早識佢哋，好彩同各人都有合照，以前影相係用菲林，如果唔見咗真係會喊出嚟。」她還給追星貼士：「阿信好鍾意食炒公仔麵，喺尖東撞到佢買宵夜唔出奇，冠佑鍾意旺角，去女人街撞佢易啲。」
阿卞帶齊裝備，不介意為撲偶像飛瞓街。
排隊高手撲飛法寶
死忠阿卞14歲時鍾意了五月天，11年過去，由頭幾年買飛不用排隊，到近5年帶齊帳篷、軟墊、摺凳、雨傘、電蚊拍等裝備瞓街：「擔心入唔到場，冇法遵守五月之約，所以排隊。」今年成功買到頭、尾場飛，他說：「最緊要了解地方規矩，早幾日去排隊，今年就提早一個星期。父母一開始都反對，見到我每年都去聽，好有熱誠，仲因為五月天變得積極，佢哋都叫我小心啲，阿媽知我好難買到飛，試過偷偷託朋友搵飛畀我，收到好感動。」
阿卞排隊時都遇過黃牛騷擾：「黃牛要我畀頭位佢，幾百蚊用錢買，我唔肯，轉頭佢搵八九人包圍要我交位，最後報警。」
壽司（左）和小喬製作貼紙，五月天也試過貼上身做騷。
學生少女DIY貼紙
今年20歲的壽司和19歲的小喬是「千人貼5」成員，3年前開始DIY五月天主題貼紙，炮製千人在紅館貼「5」字貼紙的場面，壽司說：「年年喺紅館門口嗌五月天，希望佢哋收貼紙，頭兩年佢哋有貼住做騷，好開心。」兩人仍是學生，家人有否反對追星？壽司坦言：「阿媽會話功課又未搞掂，使唔使咁迷日日去紅館等。」
為了看五月天演唱會，小喬要節衣縮食：「仲係學生冇收入，捱咗幾個禮拜麵包，當係減肥一種方法，畀佢啲歌感動，想現場睇。」壽司說：「假期做兼職儲錢，買咗三場，都係最平。佢哋有神奇魔力，音樂上有對話，叫年輕人唔好放棄夢想，我都係畀佢哋鼓勵學結他。」
from:
http://hk.apple.nextmedia ... 160520/19619240
