《Se7en》7將日前穿上整齊軍服打War game為ViuTV開台打氣。攝影：陳俊強
【ViuTV開台】超人氣韓劇《太陽的後裔》登陸ViuTV，今日雙宋殺到香港，令一眾劇迷引頸以待！而ViuTV真人騷節目《Se7en》的七位成員陳子豐、駱振偉（Thor）、陳俞希（Hailey）、黃奕晨（Dixon）、岑樂怡（阿妹）、朱鑑然（朱仔）和楊偲泳（Renci）都是《太陽》擁躉，日前穿上整齊軍服進行一場特訓，齊心嗌口號：「團結」為ViuTV後日開台打氣！
撰文：嵐山
《Se7en》首播日期：4月10日9:30pm（逢週日播出）
後日，電訊盈科旗下免費電視ViuTV便正式開台，以主打實況娛樂硬撼獨大多年的無線電視，ViuTV製作的真人騷《Se7en》，將於下週日首播，由七位年輕藝人的夢想出發，日前他們在新蒲崗一個War game場進行分組BB彈槍擊賽，由陳子豐率領黃奕晨和岑樂怡對戰駱振偉率領的陳俞希、朱鑑然和楊偲泳，子豐和Dixon積極進攻，打到碌地沙，雖然中槍但成功俘虜Hailey。
《Se7en》7位成員列陣敬禮，齊心嗌「團結」，希望新台可吸引觀眾。
一班年輕人玩得忘形，岑樂怡（右二）單手提槍，似模似樣。
吸後生仔捧場
子豐、Thor、阿妹、Dixon和Hailey都是由收費台的nowTV轉至免費電視ViuTV旗下做藝人，子豐說：「我同Thor最早加入now，已經5年，我哋唔係大台，唔使幾百人爭一個角色，有更多機會騷嚇自己嘅才能。可能大家會覺得要贏收視係妙想天開，但我哋都會盡全力去打呢場仗。」阿妹則說：「其實𠵱家最重要係吸引番一班唔開電視嘅後生仔，等佢哋睇番電視。」
Thor認為《跟住矛盾去旅行》最具賣點，他說：「本身電視製作有好多框架，我哋就要嘗試打破，睇預告片見到音音姐（邵音音）講『曲街』，似諧音粗口，但出街又有乜所謂？我覺得係挑戰電視底線，亦係創意上嘅發展。」
子豐是標準《太陽》劇迷，更會跟貼ViuTV的網上版追看：「宋仲基太多人鍾意，其實陳久都好型，又Cool又勁。」Hailey讚宋慧喬：「喬妹好索，細細粒但carry到啲衫，係氣質問題。」雙宋今日抵港，他們都希望一睹巨星風采。
場地及裝備提供：Impact Force C.Q.B.（War Game）
【開台提提你】雙宋今襲港
ViuTV以超人氣韓劇《太陽的後裔》作開台重頭節目，電視台更邀得《太》劇男女主角宋仲基及宋慧喬來港宣傳，二人今日飛抵香港為ViuTV進行宣傳。
from:
http://hk.apple.nextmedia ... 160404/19556417
