第18屆華鼎獎噚日喺澳門新濠影匯舉行頒獎禮，傍晚6點幾莫文蔚（Karen）、張信哲、林保怡、導演許誠毅、韓國組合Super Junior成員曹圭賢，同女團f(x)嘅Krystal、Amber、Luna等先後現身紅地毯，當中台灣藝人林心如以一件開胸連身裙性感搶去風頭。
林心如
尹恩惠噚日現身紅地毯，甜笑揮手。
周麗淇露出小蠻腰，成功搶鏡。
唔抗拒拍拖
林心如俾記者追問係咪有新戀情？事緣前日心如喺微博貼咗張買咖啡嘅相，有眼利嘅網民見到有咖啡杯上寫住「張先生」，懷疑係心如男朋友，心如笑笑口解釋話：「去年跌倒弄到下巴有勾勾（疤痕），早幾天在咖啡店就是想拍那勾勾，拍照的是我經紀人張先生，那位讀者很眼利，也很關心我的感情生活，謝謝他。」心如笑言目前暫時未有感情生活，拍拖對象就只有工作，𠵱家單身都幾寫意，但假如遇到合適嘅人都不抗拒。而林心如噚晚獲頒中國最佳電視劇女演員。
至於Karen同張信哲受訪時話：「我哋嚟攞中國最佳男、女歌手獎，咁啱大家遲啲都會喺度有演唱會。」另外，李晨獲頒中國最佳電視劇男演員，佢話完咗活動會坐夜船到香港會合女友范冰冰。
撰文：馮仁昭
馮仁昭
from:
http://hk.apple.nextmedia ... 160401/19552651
