章子怡同汪峰舊年5月喺香港秘密註冊結婚，話都冇咁快，囡囡「醒醒」去年底就喺美國出世。子怡上次趁囡囡滿月，喺微博貼咗張心心尿片嘅相，只係見到腳仔，噚日子怡又再貼囡囡尿片相留言：「小醒醒已經快三個月了，那天帶她去打疫苗，我問護士能不能看一下接種疫苗的名稱、刻度、保質期，她們都很配合，因為美國曾經出現過給孩子打過量的事件，為了孩子避免不必要的傷害，醫生護士下手前請家長們『多句話』，我想這都能被理解，小醒醒下一針就要在北京打，我會問得更清楚！」
前科纍纍好擔心
作為中國子民嘅子怡，深明內地嘅品質同殺傷力，事關咁啱濟南警方就破獲咗單非法經營疫苗案，做媽咪嘅聽到呢啲消息都咪話唔驚，所以子怡都有微博轉發呢單新聞兼留言話：「中國疫苗安全問題，現狀堪憂，我自己的微博就發過好幾次……」子怡一再提醒家長，帶小朋友去注射時要小心確認。而之前有消息話子怡會接拍部中美文化題材喜劇電影《East/West》，睇嚟佢趁復出前先帶囡囡返北京見下啲世叔伯。
撰文：馮仁昭
from:
http://hk.apple.nextmedia ... 160322/19539065
