梁思浩同大台嘅恩怨真係一疋布咁長，話說12年前即係2004年大台嚟個大裁員，梁思浩就係其中一個被裁嘅人，當時佢仲開記招嚟個大控訴。方丈份人係點大家都知，12年嚟梁思浩多次開口話想返大台，不過都係唔成事，但係最期待嘅畫面終於出現喇！
梁思浩昨午喺微博開post話，事隔12年，終於可以再次喺大台頻道現身喇！雖然唔係回巢，只係應李居明邀請上節目做嘉賓，佢留言話佢咁多年嚟唔嬲大台，而係「大媽」高層：「破冰之旅。已經12年冇出現TVB螢光幕上，其實我跟TVB一直無仇無怨，也不憎恨TVB，只是一直憎恨一個恃勢欺人整容大媽高層，12年來很多無線藝人也因為這個整容大媽離開TVB（我是敢言又不怕惡勢力的人）12年後的今天終於破冰了！謝謝為我破冰之人——玄學大師李居明！今次跟覓雪合作也超級開心，三月底TVB見。」
考古時間又到喇。
04年無線大規模裁員，台前幕後都有份，梁思浩係第一批被裁藝員。當時梁思浩話曾致電樂易玲，希望留低，樂易玲只解釋係因為梁思浩好多年冇拍劇，所以列入被裁名單。
收到大信封之後，梁思浩即含淚開記招，向傳媒展示大信封，直插樂易玲：「我覺得樂小姐你點做電視0架？我15年前先喺戲劇組……我做live show都超過一萬小時，但係佢睇電視都唔知夠唔夠一萬小時。」又痛斥無線不近人情：「最慘係扮豬扮狗，佢都唔要我！」
但梁思浩離開無線後，人工大躍進，由$3,000一個騷加到6位數做亞姐司儀，之後跳槽有線《怪談》又做飲食生意，越撈越掂。梁思浩亦唔再俾面樂大媽……係樂易玲至啱，講到明話無線有黑名單：「張黑名單喺樂易玲個手袋入面，我同黃日華都返唔到無線，除非等樂易玲唔喺無線做就有機會。」
之後樑思浩又去過各大電台、電視台工作過，仲開埋糖水舖兼中埋六合彩發埋達，不過佢就唸唸不忘大台，多次接受訪問都放曬口風話:「我成日都想返TVB！」2012年仲話:「有提過想搵我做大騷，我實OK！」最後都唔成事。
2013年，無線再有藝員科同事接觸過佢邀其回巢做主持，梁思浩當時話:「其實大致上都可以，只係錢嘅問題，對方好有誠意，因為對方唔夠直播主持。」結果又係無疾而終。
去年底，已躍升為甜品大亨嘅梁思浩，於訪問中再放風話，如果曾勵珍同余詠珊邀請佢嘅話，佢唔收錢都願意返無線喎。
有傳樂小姐失勢，轉去邵氏發展，而梁思浩咁啱又係呢個時候「破冰」，喺大台亮相，有冇咁橋呀！
from:
http://hk.apple.nextmedia ... 160316/19531704
