日本組合AKB48早幾年能夠爆紅，其中一大因素係兩大阿姐前田敦子同大島優子鬥過你死我活。而前田同大島已經離開咗AKB，雖然間中都有返去客串，但佢兩個都以女演員為主，前日佢哋同日宣佈拍劇，前田就主演半夜播出嘅劇集，大島就會客串收視高企嘅晨早劇場《阿淺來了》。
前田將會主演下個月20日首播、喺半夜12點播出嘅新劇《毒島由裡子赤裸裸的日記》，佢扮演一名政治記者，但係戀愛方面就抱住絕對唔專一嘅心態，任何時候都要一腳踏兩船，係好開放嘅女子，劇中仲會有好多咀戲，喺劇集張海報中，前田仲趷籮露出左邊少少patpat，相當誘惑。
至於大島優子方面，就會客串NHK電視台晨早劇場《阿淺來了》，呢套劇已經播到尾聲，一直以來收視高企，平均都過20%，NHK台話大島係壓軸客串嘉賓，扮演爭取女權嘅日本婦散先峰分子，大島拍過好多超大膽寫真，唔怪得NHK話覺得個角色好適合佢。
from:
http://hk.apple.nextmedia ... 160305/19517625
