賭王嘅幾位公子最近都戀事多，何猷君同富女友Kimmy打得火熱，另一邊廂何猷亨亦情傾宅男女神陳瀅，更同傳媒直認係拍拖，相當重視女方。
昨晚8點半左右，仲係P牌嘅猷亨，揸住架跑車載女友去到史丹利街附近一棟商廈食飯，猷亨明顯對架車唔係好熟，喺史丹利街連泊3個車位都唔成功，要搵代客泊車幫手俾指示，不過花咗成十分鐘都泊唔到嗰三個位，之後就去咗隔離街一個非車位泊車，搞咗一輪泊好車後，兩個人落車睇下架車有冇花。
見到冇花，陳瀅就一馬當先行，猷亨拿拿臨鎖車，之後急急腳追上去拖實女友，佢哋上咗去商廈食飯，大約45分鐘後，猷亨同一位男性朋友落返去架車到，喺車尾廂拎咗啲嘢比個朋友睇，又可能此時襯女友唔喺身邊，猷亨就食返支煙先，可能女友唔鐘意喺佢面前食煙。
去到10點半左右，猷亨就同女友手拖手閃人，兩人拖手時揈下揈下，真係甜到隔住個Mon都feel到，又一邊有講有笑咁上返跑車，猷亨好有風度咁車女友返九龍站上蓋嘅君臨天下寓所。
from:
http://hk.apple.nextmedia ... 160118/19456939
