曾拍韓劇《製作人們》的女歌手IU襲港，前晚假九展舉行演唱會，騷美腿又唱又跳，IU不但請粉絲上台玩遊戲，又大曬廣東話打招呼：「大家好，我係IU，好掛住你哋，好開心，我對你哋一見鍾情。」全晚最驚喜是IU竟唱出謝安琪的《囍帖街》這首廣東歌，咬字清晰唱得有感情，觀眾尖叫拆天。
IU表示揀唱《囍帖街》，是喜歡它背後的故事。
IU又用廣東話向港迷打招呼。
阿Y謂IU唱得流利又有感情，非常難得。
資料圖片
鍾意歌曲背後故事
IU唱完這首歌亦鬆一口氣，見到觀眾反應熱烈開心到儍笑，不停用手撥涼，似乎仍緊張未平。據知IU聽了多首歌後，最後揀唱《囍帖街》，除了因為這首歌好聽，亦因為歌曲背後的故事。而IU昨已離港，有半百粉絲送機。她唱《囍》的短片在網上瘋傳被洗版，在YouTube的點擊至昨午已逾16萬，網友狂讚好勁好犀利，聽到起曬雞皮。
《囍帖街》作詞人黃偉文（阿Y）亦在Instagram激讚：「現在還有多少人為歌迷開心三分鐘而下這種苦功？真的被感動到，謝謝。」阿Y昨在電話說：「嗰排因為拍電影，要喺三、四日內學幾句完全唔熟悉嘅泰文，當時完全學唔到，明白學陌生語言係有幾難，因為你係要憑空死記發音。唱歌仲難，因為連停頓、考慮機會都冇，所以要更熟。見到IU唱《囍帖街》，不但由頭唱到尾，仲有咁多唔係幾重複嘅歌詞，佢唔使睇提詞器而又唱到，我覺得真係幾感動。」
大讚流利兼有感情
阿Y坦言：「掉番轉頭，你畀首韓文歌，要我學三個月半年唱番咁流利，我一定冇本事。重點係佢仲唱到有感情，據說佢揀呢首歌嘅原因，係佢好鍾意呢份歌詞寫嘅嘢，呢個係我覺得另一個感動原因。近年有咁多人云亦云嘅廣東人，等爭住話廣東歌唔好聽嘅時候，竟然有韓國人欣賞廣東歌，你話點可以唔感動！」
採訪：皓騫
from:
http://hk.apple.nextmedia ... 151023/19343501
