蘋果上星期喺美國舉行咗發佈會，公開咗iPhone6s、iPad Pro、Apple Pencil等等，當中最受注目當然係玫瑰金iPhone6s。亞洲明星之中，得吳君如同老公陳可辛現身當日發佈會，而一向搶先曬iPhone新機嘅頭號果迷林志穎，今次竟然冇影，正當大家都以為佢今次輸曬畀君如嘅時候，林志穎終於出手喇！
事緣林志穎嘅經理人前日喺微博上載咗一張，小志喺機艙入面嘅相，相中佢戴住黑超，不過最搶眼係佢手上揸住一部iPhone。睇真啲……原來就係傳說中嘅玫瑰金iPhone6s，搞到一班網民又葡萄又妒忌。
林志穎仲回應咗台灣《蘋果日報》：「是最新的iPhone6s沒錯，（大）前天拿到的。」問佢男人用玫瑰金唔怕俾人笑咩？他就話：「我摔破過3支iPhone，摔怕了，一定用保護殼，一裝上就看不出來啦。」不過林志穎冇透露點樣得到未正式發售嘅iPhone6s，只係話喺「秘密管道」取得。而前日嘅機艙相，係佢同懷孕嘅老婆陳若儀以及6歲嘅囝囝Kimi出發去峇里島度假。
from:
http://hk.apple.nextmedia ... 150920/19302736
