陳慧琳（Kelly）胞弟陳司翰同莊思敏胞妹莊思明呢段「司明戀」，相戀4年，又分又合，又合又分，完全係歡喜冤家，當年車廂激嘴令戀情曝光，佢哋外形好登對，但就火星撞地球，拍拖一年幾，兩人夜蒲澳門已爆出爭執動粗並驚動當地警方，事後各自否認，跟住佢哋又和好如初。跟住又爆出陳司翰花弗偷食，背著莊思明去台灣狼媾E奶混血女模貝兒，莊思明傷心向友人哭訴。舊年莊思明突然展示身體瘀痕，傳遭男友家暴，兩人之間認真鑊鑊新鮮，但依然掟煲唔掟蓋，關係始終斬唔甩。
【密密斟】
陳司翰同莊思明喺ＰＱＭ逗留咗20分鐘左右，就轉場醫肚。
【玩自拍】
陳司翰興起，仲攞手機出嚟同莊思明玩自拍。
【四圍行】
陳司翰同莊思明前晚拍拖去中環搵餐廳食晚飯。
並肩行商場
「司明戀」最新發展係又再糖黐豆，佢哋前晚8點幾又孖咇出動，拍拖去咗中環PMQ，當時正係晚飯時間，佢哋入商場諗住開餐，但就搵唔到啱心水餐廳，由於有唔少途人，所以佢哋都避免太過親暱，只係並肩而行。見到商場有爆旋陀螺凳，佢哋又童心未泯坐上去喺咁玩，又自拍，好投入，全程好sweet，之後又再去咗一啲小店睇嘢，前後逗留大約20分鐘就離開商場，攞車轉場醫肚。
莊思明向來都避談感情事，記者噚日打電話畀佢都唔例外，佢話：「我不嬲好少講自己嘢，低調啲好。」思明仲拒絕回答同陳司翰𠵱家係咪情侶關係。問莊思明有冇閃婚衝動，佢坦白話：「已經過咗最想結婚嘅時間，今年冇結婚衝動。」
採訪、攝影：陳辰、畢紹基
from:
http://hk.apple.nextmedia ... 150916/19296548
