永盛電影公司老闆向華勝喺上年11月佢因食道癌病逝，終年64歲。佢前妻張美齡（Stella）仲專登上咗佢屋企裝香，估唔到Stella喺今年7月6日因膽囊癌過身，終年59歲。
Stella喺無線藝訓班出身，同劉德華同期，後來佢嫁畀向華勝，嗰時華仔經常拍佢老公嘅戲，所以經常會見面，直至Stella同華勝離婚，改嫁後變得好低調，同圈中人幾乎冇接觸。
華強太太痛心
Stella嘅喪禮已經喺上個月1日喺堅尼地道佑寧堂舉行，遺體其後送咗去哥連臣角火化。聽講Stella嘅家人好低調，因佢臨終前吩咐個女，等佢後事搞好曬先好通知親友，免得打擾人哋，所以好多人都係事後先得知死訊。而向家亦有成員送花籃致意。
張美齡同前夫向華勝先後因癌病過身。
張美齡於上月舉殯，向華勝大哥向華炎嘅大女向詠怡，都有送花籃去靈堂。
噚日記者打畀華勝阿嫂向華強太太陳嵐，佢話7月收到死訊都好意外同心痛：「Stella喺7月6日凌晨過身，上個月已經舉辦咗喪禮。上年我知道佢生癌，仲知佢因為唔想家人負擔咁大筆醫藥費，唔打算醫，後來我勸佢一定要醫，叫佢唔使擔心醫療費，我仲叫埋佢啲無線藝訓班同學一齊出嚟鼓勵佢，終於佢都肯接受治療。上年華勝過身，我介紹咗華勝老婆櫻子畀佢識，後來Stella仲上咗華勝屋企裝香。想唔到今年到佢都走埋，做人真係化，我同佢個女有聯絡。」
撰文：馮仁昭
from:
http://hk.apple.nextmedia ... 150907/19285296
