打扮中性嘅林二汶，被內地K場選歌版面列入男性歌手。
前組合at17成員林二汶，出道至今都係走中性形象，但點都諗唔到內地K場嘅港台男星，二汶竟然係榜上有名，選歌名單同周潤發、黎明、成龍同伍思凱等並列同一版面，荒謬到爆燈！
林二汶也有作女性打扮出席頒獎禮。資料圖片
「想知誤會點嚟」
對於被搞到變「性」，馮仁昭噚日打畀二汶，佢喺電話度話：「呢個卡拉OK將我擺喺港台男星，我覺得好榮幸，因為我身邊係成龍、黎明同周潤發，我成日都去諗，如果我有機會去報名一個獎，我最恨得到係最佳男歌手，因為我知道永遠冇可能，但多謝卡拉OK幫我category咗呢個位，我覺得有希望啦，所以我會畀心機努力，繼續做好我嘅事業，希望有一日達到呢個位。」
問二汶有冇諗過點解會擺咗入港台男星？佢話：「可能我短頭髮同個樣比較中性，其實女性有嘅器官我都有，亦都唔係唔明顯。我想知誤會點嚟，但冇所謂，能夠同天王巨星擺喺同一個category，我感到非常榮幸，yeah！」二汶睇完得啖笑，反而粉絲就戥佢唔抵，二汶話：「人生其中一個幾有趣經歷。」
撰文：馮仁昭
馮仁昭
from:
http://hk.apple.nextmedia ... 151014/19331975
