嫁咗入豪門嘅張新悅生咗3個囡囡之後，過住闊太生活，一家五口生活美滿，不過呢位少奶奶喺湊女方面就好親力親為，成日見到佢帶住幾個囡囡周圍去。
為愛女做到足嘅張新悅，唔介意踎低揀玩具。
母女經雞啄唔斷
噚日馮仁昭就見到張新悅變身做萬能媽，拖住大女Lucy同二女Lily，前面再孭住三女Leah，連埋外傭姐姐喺中環出現，不過外傭姐姐只係負責拎啲雜物，湊女嘅工作都係由張新悅一手包辦。佢哋一行五人上咗去畢打行嘅5樓，嗰度全層都係賣啲細路仔嘢，張新悅抱住Leah，陪住Lucy同Lily周圍睇玩具，大女二女好乖咁同媽咪一齊行，睇見啲得意嘅嘢仲會一齊研究嚇。
雖然花多眼亂，但張新悅都冇忽略Leah，見到啲啱佢玩嘅嘢，都有踎低同佢玩，揀咗一輪之後，一家人好滿足咁落樓。等過馬路嗰陣，兩個囡囡都好乖咁拖實媽咪，仲好似有好多話題咁講唔完，就算有途人認得張新悅，佢都一於懶理，繼續同囡囡傾偈，之後佢哋就行去的士站坐車走人。
撰文：馮仁昭
馮仁昭
from:
http://hk.apple.nextmedia.com/entertainment/art/20150812/19251920
