本年度最矚目嘅日本電影《進擊的巨人》將會分成上下集喺今個夏天上映，香港映期分別定在8月13日同埋9月尾，雖然日本明日先至開畫，但係本報記者日前飛到東京參與全日本唯一一場首映禮，比日本影迷更早先睹為快。
真人版《進擊的巨人》萬眾期待，男主角三浦春馬有望憑艾倫呢個角色進一步打開亞洲市場，片中佢同水原希子扮演嘅女主角米卡莎青梅竹馬，電影一開場已交代艾倫、米卡莎以及本鄉奏多飾演嘅阿爾敏係由細玩到大嘅好朋友，其實單係一眾要角之間嘅人物關係已跟原著有頗大出入。
原著交代艾倫父子救咗米卡莎一命，仲大開殺界，令米卡莎決定與艾倫出生入死，並發展出如同親人嘅深厚感情，互相視對方為最重要嘅人。真人版方面，三位主角親眼目睹傳說中嘅巨人入侵城牆見人就食，米卡莎為救一個細路女，結果同艾倫失散多時。之後，艾倫一直自責未有拯救米卡莎，令佢決心要纖滅巨人，繼而聯同阿爾敏等一班年輕人加入調查兵團。
因一次進行任務遇到巨人襲擊，米卡莎竟然再出現艾倫眼前，而且仲被封為實力最強嘅巨人獵人敷島培養成為巨人獵人。由長谷川博己飾演嘅敷島係電影原創角色，佢留意到艾倫擁有特別潛在力量，米卡莎則憎恨艾倫當時冇救自己，繼而同敷島發展出非一般關係，預告片中出現米卡莎咀敷島一幕今次未有出現，應該留到下集先至會解決呢段漫畫中冇嘅三角關係。
另外睇過原著漫畫嘅fans，當然會記得原著中其中一幕經典場面，就係艾倫巨人化反對付番啲巨人，電影戲肉亦係三浦春馬飾演嘅艾倫被大肚腩巨人吞落肚後，嬲到無法自我控制下變成巨人化，而巨人化後嘅艾倫發揮出格鬥潛能，喺米卡莎以及一班夥伴面前殺盡兇殘巨人，大銀幕上觀看十分震撼！
from:
http://hk.apple.nextmedia ... 150801/19239592
