黃宏舜（娃娃舜）14年前唱林曉培嘅《娃娃愛天下》參加《都市閒情》搞嘅歌唱比賽，因為「歌精舞勁」引起好多人注意，佢嘅facebook已經有接近5,000人like，噚日娃娃舜就係facabook留咗4個字「蓄勢待發」。呢4個字咩意思呢？馮仁昭收到風，娃娃舜今日會現身電影《猛龍特囧》喺荔園搞嘅宣傳活動，以神秘嘉賓身份同雨僑合唱。
噚日娃娃舜喺facabook留言「蓄勢待發」。
經常戴帽嘅江華，接受有線娛樂台訪問時話自己戴帽冇技巧。
江華指惡搞有創意
至於，當年狠批娃娃舜、最近轉行做保險嘅江華自己亦翻hit，日前佢接受有線訪問，大談網民將佢同劉江、劉華同劉江華嘅惡搞，包括「四人合體」照，江華大方話唔介意，仲自爆一直都有留意佢哋嘅惡搞，覺得佢哋好有創意，如果擺喺藝術創一定好出色咁話。
之後主持問佢覺唔覺得自己似劉華，江華諗都唔諗就答：「唔似！佢靚仔過我好多！」但講完又笑住補充：「禮貌上我應該咁答！」搞到大家哈哈大笑。不過，佢都正經話好感激網民嘅支持，仲承諾大家，佢一定會拍一部非常精采嘅戲回報大家㖭！
撰文：馮仁昭
馮仁昭
from:
http://hk.apple.nextmedia.com/entertainment/art/20150727/19233294
