史力加之父許誠毅執導、白百何同井柏然演出嘅《捉妖記》氣勢如虹，喺內地上咗畫三日已經收咗5億人民幣（下同）票房，而噚日下晝4點前已過咗億元票房，即係四日已超過6億，睇個勢收15億冇乜大問題，部戲用咗成2億嚟拍，宣傳費使咗成億，加埋3億成本，部戲收10億先至有錢賺，安樂公司老闆江志強都真係好博，好彩今次博中咗，可以執番億幾兩億純利。
由井柏然（右）主演嘅《捉妖記》四日票房已過6億。劇照
《道士下山》票房麻麻
呢部戲男主角原本係柯震東，但後來因佢吸毒俾內地官方封殺，安樂公司被迫換人，點知搵咗井柏然代佢重拍，做埋後期製作後，先知柯震東獲解禁，好多人都替江老闆唔抵，浪費咗筆冤枉錢。但正正因為咁，好多網友同情呢部戲，所以去捧場，反而罷睇冇換走房祖名嘅《道士下山》，好明顯《道》片票房只得4億，冇預期咁好。此外內地有道教團體對《道》片肆意醜化道教表示不滿，要求停播。
不過噚日內地傳來消息，話安樂正研究等井柏然呢個版本上映到尾聲時，會向電影局送審柯震東版本嘅《捉妖記》，希望獲准上映，滿足柯震東的粉絲。噚日安樂宣傳部發言人Vinus話：「據瞭解，目前在北京官方廣電局未獲准及授權下，《捉妖記》是不可能有兩個版本放映的。」
撰文：馮仁昭
from:
http://hk.apple.nextmedia ... 150720/19225331
