梁詠琪（GiGi）同老公Sergio早排幫囡囡Sophia（祈淑菲）搞咗個百日宴之後，前日兩公婆又再帶埋囡囡出動，由老公負責孭住囡囡一齊喺中環行街。當日下午1點半左右，GiGi一家三口行到歌賦街見有啲熱同口渴，兩公婆入咗一間咖啡店，買咗一人一杯凍咖啡解暑，步出咖咖店嘅時候，醒目嘅GiGi見到有記者影相，即刻友善咁微笑打招呼。
之後過馬路嘅時候，Sergio仲好細心咁拖住GiGi行，見到GiGi原本想去一間精品店行，但俾架洗街車擋路而放棄。不過行咗唔夠5步，GiGi都係決定暫時撇低老公同個女入咗間精品店逛咗一個圈。
Sophia
【洗街阻路】
因為洗街車阻路，令GiGi一度放棄去行精品店。
【賣甩老公】
GiGi撇低老公同囡囡，返轉頭去精品店行咗陣。
【百密一疏】
可能掛住湊囡囡Sophia上車，GiGi唔記得攞返放喺車頂嘅凍咖啡（箭嘴示）就出車。
臨走大頭蝦
之後兩公婆沿住山路行返停車場攞車，沿途GiGi輕撫住老公背脊，家庭樂顯得好溫馨。去到車場老公Sergio將囡囡交畀老婆，安排佢哋坐後座之後就負責開車。不過期間就發生一段小插曲，當佢哋駛出停車場閘口嘅時候，兩公婆好友善同記者揮手拜拜，不過記者就赫然見到車頂放咗杯未飲完嘅凍咖啡，相信係GiGi掛住照顧囡囡而唔記得放咗喺度。
另外，噚日有雜誌報導GiGi將加盟星皓電影公司做一姐，佢噚日透過助手話係有咁嘅事，仲話：「合作唔止電影，而且自由度高，大家可以有好大空間發展，嚟緊會有唔同計劃。」星皓方面亦都透過發言人話，老闆黃海峰同GiGi識咗好耐，一直都好想同佢合作，而促成今次加盟。
採訪、攝影：吳耀輝、黃曉程
from:
http://hk.apple.nextmedia ... 150626/19198108
