周嘉儀拍過五次拖失戀喊足一星期

前無線美女主播周嘉儀，稱得上宅男女神，即使被爆曾跟有婦之夫許方輝有過一段曖昧之情，嘉儀回應是非時如止水般冷靜，但原來百毒不侵的女神背後也有死穴！日前嘉儀接受本報專訪時，大爆她過去五段絕密情史！早前錯愛許方輝更令她吸取教訓，情路跌碰以後，女神惟有繼續靜待其Mr.Right的出現。撰文：羅慧敏

感情篇：身邊男仔朋友多

記：記者　周：周嘉儀

記：拍過幾多次拖？

周：一隻手數得曬，五次咁上下。

記：你嘅初戀發生喺幾時？

周：係讀大學嘅時候，嗰陣20歲。

記：咁遲先初戀？

周：因為我中學讀女校，都冇乜機會識到外面嘅人，到year2，都算好遲，拍咗3、4年，係最耐嘅一個。

記：因乜事分手？係咪好傷心？

周：可能累積落嚟，耐咗悶咗定係性格不合，都唔知歸根究柢係乜原因，總知係好傷心！喊到儍咗，因為未試過覺得好慘、天冧落嚟，因為乜嘢都好習慣，每一個禮拜有個生活模式，嗰嚇覺得好接受唔到，都傷心咗好耐，成個禮拜都匿埋喺床度喊，同埋我唔食嘢，skip咗好多餐晚飯，嚇死我阿媽，嗰陣唔知點解仲狂游水，一日落去游三次水，覺得游水係好放鬆，可以減到壓。

周嘉儀與無線新聞主播許方輝大前年被爆關係曖昧，二人立即被公司雪藏。

上月結束11年的主播生涯，周嘉儀現已轉職證券公司女強人。

記：之後幾段感情都好平淡？除咗同已婚無線新聞主播許方輝嘅一段情……
周：唔……唔……唔好講啦！過咗去都唔想影響到其他人。人生當中發生咁多事，每樣嘢都總有學到嘢、有得著嘅地方。

記：算唔算係一個教訓？

周：都係嘅，當時我屋企人同埋一啲愛錫我嘅朋友，喺我人生最低潮時畀到好多support我，呢啲朋友真係刻骨銘心，亦都學識點樣喺低潮嘅時候幫自己搵出路，呢樣好緊要，一味頹落去都冇用，只會越嚟越沉，你要諗嚇之後條路點行，嗰嚇我真係咁多年嚟，真真正正諗嚇自己條路點行，因為之前樣樣嘢太stable，一個comfort zone裡面，嗰次係我人生轉捩點，諗多咗將來係點。

記：咁要多謝許方輝？

周：人哋嘅嘢唔講啦，多謝身邊嘅人，尤其係嗰段時間。

記：現時多人追求？

周：我身邊男仔朋友都多，但真係追就唔多覺，可能我個人都男仔頭，啲人成日話我講嘢冇尾音，啱傾嘅有，出嚟食嚇飯嘅都會有，但朋友囉，追嘅就唔係太多。我又唔係話好急，因為工作各樣都好忙，拍拖都會開心、好sweet嘅，但係冇都唔會特別care，順其自然。

記：有冇驚過自己會嫁唔出？

周：冇話特別怕嘅，如果真係嫁唔出都冇辦法，自己就冇特別諗幾多歲嫁。我都信緣份嘅，如果佢要嚟，會感覺到，都係隨緣，平常心，唔會強求咁多，可能20幾歲好恨拍拖，但過咗嗰個階段。

記：咁你有乜擇偶條件？

周：相處到、溝通到係最緊要，出面好多話有筍盤，但係唔夾已經冇意思，樣樣好都冇用。孝順嘅男仔我會加分，我會睇佢點同我家人相處，佢喺你面前一定表現對你最好一面。除咗孝順，都要心地好、有愛心，smart啲嘅男仔我都鍾意，唔係要口甜舌滑好識冧女仔，佢會喺我人生上、生活上、工作上畀到意見我，我都係需要一啲guidance嘅人。

化妝：Christy Lam
髮型：Philip Lee@ La Biosthetique
服裝提供：SEQUOIA
from:http://hk.apple.nextmedia ... 150430/19130260

嘉儀對被指女神，表示感覺親切。資料圖片
記：記者　周：周嘉儀

記：周嘉儀係一個點樣嘅女仔？

周：我係一個幾悶嘅人嚟，鍾意留喺屋企，耐悶能力都幾高嘅一個人，可以由朝到晚留喺屋企，冇乜做瞓吓覺睇吓電視，陪屋企人食吓飯，全日唔出街都得。工作上我都算幾盡責嘅員工，老闆交畀我嘅嘢一定會完成，勤力就一般啦！都係普通人，冇乜特別。

記：你性格好堅強？

周：我偏向文靜，但係唔算太柔弱，EQ都算高，我情緒起伏唔算好大，我獅子座，自專心強、鍾意表現自己。

記：被指女神或者BB，感覺如何？

周：其實係好親切，多謝佢哋支持同鍾意自己，但都OK㗎！覺得好nice嘅稱呼。出面大家都叫我嘉儀多，我都好鍾意佢哋咁叫我。

記：你心目中女神定義係點？

周：女神係神級，唔係平凡人，喺某行業或界別都有出色表現，工作專業，有好表現，會更加有吸引力。我都唔知點解會成為女神，係靚呀？我唔知個定義，但overall嚟講係善意稱呼，我接受。
from:http://hk.apple.nextmedia ... 150430/19130264

慳家的嘉儀，出入都是以港鐵代步。資料圖片
記：記者　周：周嘉儀

記：現時工作動向？

周：𠵱家幫中資嘅興證證券公司做marketing、PR，返咗20幾日工，其實主力做對外推廣、推廣間公司，同埋內部做一啲coordination（協調），遲啲我會考證券同相關牌照。𠵱家對外嘅嘢接觸多咗，希望大家更了解我最新情況，我亦都有開咗個facebook，幾好嘅一個渠道同外界接觸。

記：離開無綫新聞部後可以做番自己？

周：離開咗自由度相對大啲，始終喺新聞部有自己立場，希望記者主播形象中立少少，唔好牽涉到商業元素。間間公司有唔同文化，都好多謝呢間公司畀好多空間我去發揮。

記：係咪每日都會上fb同粉絲接觸？

周：我每日幾忙都會花時間上fb，指定動作一定睇大家畀我嘅留言，雖然未見過面，但感覺好似好熟咁，好warm，覺得好窩心同得意，𠵱家已經有2百幾個like。
from:http://hk.apple.nextmedia ... 150430/19130267

方健儀
周嘉儀上月結束新聞主播生涯，接受全新挑戰。過去一年，無綫多位新聞女主播也先後離職，包括盤翠瑩、高芳婷、蔡雪瑩、談美琪等，連體育新聞王子伍家謙亦意興闌珊離隊。較早離開的女主播們，其生活依然精采。

黃紫盈（27歲）

與張文采因工作問題不和，淚灑直播室，被網民封為「淚的小花」，前年11月離職，現為有線主持節目。

方健儀（38歲）

大前年2月24日最後一晚任主播，以一句「後會有期」向觀眾道別，後轉到廉政公署任高級新聞主任，去年10月離職，現於港台擔任主持，且自由身接司儀工作。

黃婉曼（31歲）

曾帶我們跳出香港睇天氣的黃婉曼，10年離開無綫新聞部，後到now台任節目主持，去年11月與會計師馮柏基結婚。

林燕玲（36歲）

「小飛俠」林燕玲，離開無綫後加盟now財經台，09年被拍下與已婚龔耀輝到酒店密會，現為渣打認股證銷售副董事。

趙海珠（33歲）

06年離開無綫後，轉到法國巴黎銀行推銷窩輪產品，13年到恒基任職高級經理，去年離職。11年與富二代陳昊言結婚，育有一子，現專心相夫教子。

張寶華（42歲）

前有線新聞之花，被江澤民一句「too simple，sometimes naive」而名噪一時，05年離開有線，去年推出首本小說。
from:http://hk.apple.nextmedia ... 150430/19130273

有份為YSL Beaute影相的周嘉儀，昨日親自到銅鑼灣的展覽場地捧場。

昔日無綫新聞小花周嘉儀早前聯同多位明星，大變身參與YSL Beaute流動唇妝攝影活動，相片於大前日起一連三日於銅鑼灣公開展覽，各人以趣怪造型拍攝，周嘉儀更一改乖乖女的斯文形象，戴上冬菇頭假髮，藍、黃色的圓點眼眉，以黑線框住嘴唇，搖身一變成為五、六十年代美國卡通的漫畫少女，相當破格！

周嘉儀的造型照曝光後，即成了網民惡搞對象，將她萬能key在卡通Keroro軍曹、鄭秀文（Sammi）的演唱會造型，更有網民將她key到電影《旺角卡門》的烏蠅（張學友飾）身上。

欣賞網民創意

昨日是展覽的最後一天，周嘉儀親身到銅鑼灣欣賞，不過展覽已換上新相，只能對着現場的銀幕自拍，問到被網友惡搞一事，她笑說：「第一次幫品牌影相，個人嚟講覺得個造型好突破，成件事好靚、好有性格。有人傳咗惡搞啲相畀我睇，第一下真係笑咗出嚟，真係欣賞佢哋嘅創意，可能見慣我斯文啲嗰個樣，比較突出啲，一時未接受到，大家笑吓、開心吓，我覺得OK嘅，改吓圖、發揮吓創意，無傷大雅。」嘉儀BB笑言初時較喜歡Sammi的改圖，昨日則笑指網民為她變青色軍曹，相當有心思！

網民惡搞周嘉儀變身軍曹，𠱁得嘉儀BB好開心。資料圖片

嘉儀BB喜與品牌合作，為慈善出力。

繼續搵新鮮感

被稱女神的周嘉儀月前開facebook賬戶，目前已經有兩萬多like，問她若然網民接受不到她的破格造型，會否以後不再創新嘗試？周嘉儀說：「唔會嘅，多啲新鮮感畀大家睇係好事。」EQ極高的嘉儀BB更謂不會因被惡搞而不高興：「大家都係留意呢個活動先改圖，慈善嘢，吸引到大家，OK嘅。」

採訪：羅慧敏
攝影：陳俊強
from:http://hk.apple.nextmedia ... 150504/19134534